Na conta de youtube do PGL estám já disponíveis todos os temas musicais apresentados ao concurso “Musicando Carvalho Calero”. O prazo de envio de propostas finalizou na semana passada, com umha avalancha de novas composições, algumhas das quais tivemos possibilidade de mostrar neste meio, entrevistando as pessoas autoras, como fôrom O Português, Azulula, MJ Pérez, José Carballido, Volvox, Sons do Celeiro e Luís Álvarez Guillán.
No concurso participam bandas e solistas de mui diversos estilos musicais, e todas conseguem adaptar algúm poema de Carvalho Calero; mais umha forma de dar a conhecer a figura do autor homenageado polo dia das letras galegas deste ano 2020.
A partir de agora a decisom está na mao do júri que tem o labor de realizar a escolha dos 10 temas finalistas que passarám por umha fase de votaçom popular na Rede. O jurado está composto pola jornalista cultural Maria Solar, os músicos Tito Lesende, Alonso Caxade e Alfonso Espiño, a produtora cultural Aitana Cuétara, e o professor universitário Carlos Quiroga.
O jurado está composto pola jornalista cultural Maria Solar, os músicos Tito Lesende, Alonso Caxade e Alfonso Espiño, a produtora cultural Aitana Cuétara, e o filólogo e professor Carlos Quiroga.
Na próxima segunda-feira, dia 5, a seleçom das 10 músicas finalistas será feita pública no Diario Cultural da Rádio Galega. E aí será divulgado o sistema de votaçom através dum sistema online que evitará a duplicidade de voto.
Finalmente o nome da música ganhadora será divulgado a 30 de outubro, 110º aniversário do nascimento de Carvalho Calero.
Está em jogo um prémio em metálico de 1.500 euros que entregará a AGAL e, por parte da CRTVG, a promoçom, entrevistas e actuaçom na Rádio Galega e na TVG. O ganhador ou ganhadora poderá gravar o seu tema nos estúdios da Rádio Galega, incluída a gravaçom dum vídeo musical.
