Igreja do emblemático porto do cantábrico galego abre exposiçom fotográfica de epitáfios

Durante a manhã do passado 27 de dezembro celebrou-se em Rinlo a inauguraçom da exposiçom  Palavra e Memória, que recolhe um conjunto  de  fotografias de placas e lápides da igreja e o cemitério locais. A mostra, preparada por Rosana Posada Expósito, reúne imagens de epitáfios e de placas colocadas na igreja com dous motivos diferentes: a restauraçom de umha embarcaçom votiva e a homenagem ao sacerdote Alfonso Pampín, que exerceu nesta paróquia de Ribadeu durante trinta e nove anos, entre 1954 e 1993, sendo um grande dinamizador da cultura galega e da economia da localidade.

Durante a inauguraçom tomaram a palavra a coordenadora do trabalho de campo e da organizaçom da mostra, Rosana Posada Expósito; a vizinha Lola Alonso Castro, em representaçom das famílias que propiciaram as inscriçons recolhidas na exposiçom e que certificam que o legado de Alfonso Pampín continua com pleno vigor vários decénios depois da sua morte; e Bernardo Penabade, em representaçom do Modelo Burela, a entidade que vincula a dinamizaçom cultural com a económica e que serviu de referência para o conjunto destes trabalhos realizados em Rinlo.  O desenvolvimento do encontro foi gravado por Matías Nicieza, um dos artífices do Modelo Burela e o responsável do acompanhamento audiovisual desta iniciativa de educaçom social inspirada na pedagogia de Ricardo Carvalho Calero.

A exposiçom está aberta ao público durante o período do Natal e pode visitar-se ordinariamente aos domingos, desde as 11:00 da manhã. Para visitas noutro momento, que podem ser guiadas, é necessário agendar através do whatsapp do teléfono 672434197.

 

[Texto elaborado pola família da bióloga e ex-docente Lola Alonso Castro para acompanhar a imagem dos epitáfios escritos em memória dos seus parentes no cemitério de Rinlo (Ribadeu)]