PGL – Resta já menos de um mês para a finalizaçom do prazo de envio de originais à XXIII ediçom do Prémio Nacional de Poesia ‘Xosemaría Pérez Parallé’. Junto com o Carvalho Calero, é único certame do País que dá liberdade normativa às pessoas participantes.
Devido a que este concurso se convoca com o objetivo de colaborar na promoçom de novos autores, é requisito prévio nom ter publicado nenhum livro individual de poesia, se bem se admitirám trabalhos de pessoas que tenham publicado algum livro em ediçom de autor.
O júri vai estar integrado por três pessoas de «reconhecida trajetória» no âmbito da escrita literária, da ediçom ou da crítica. A composiçom conhecerá-se posteriormente ao fim do prazo de envio de originais, que expira a 1 de outubro, e antes da comunicaçom das votações do certame.
As pessoas participantes apresentarám um livro de poesia em galego, com liberdade normativa. Será o júri o que determinar quais trabalhos possuem as caraterísticas para poderem receber a consideraçom de «livro». Em todo caso, recomenda-se umha extensom mínima de 300 versos.
Os textos apresentarám-se por tiplicado, devidamente encadernados ou grampados, identificados «inequivocamente» com pseudónimo ou lema e acompanhados de um envelope fechado. No exterior deste fará-se constar o pseudónimo, lema ou título da obra, e no interior incluirá-se o nome completo do autor ou autora, bilhete de identidade ou passaporte, endereço e dados de contato (telefone e correio eletrónico). No caso da publicaçom prévia de um livro individual em ediçom e autor, fará-se constar o título, ano de publicaçom e, se o tiver, ISBN.
Cumplimentado o passo anterior, os trabalhos devem-se dirigir antes de 1 de outubro ao Círculo Mercantil e Industrial-Unidade de Fene, situado no n.º 21 do Porto do Rio (Sam Paio, Fene).
Prémio
A entrega do prémio terá lugar no sábado dia 20 de novembro nas instalações da entidade convocante, em Fene. Consistirá na ediçom do livro dentro da coleçom de poesia da editora Espiral Maior «no prazo mais breve possível», e a primeira ediçom terá umha tiragem de 800 exemplares.
Ganhadores anteriores
Na anterior ediçom o ganhador foi Ramón Neto, com ‘A estación única dunha illa’. Em 2008, a ganhadora foi Susana Sánchez Arins, com o poemário [de]construçom. Em edições anteriores resultaram galardoados poetas como Valentina Carro, Xiana Árias ou Mário Regueira, entre outros.
+ Ligações relacionadas:
- Blogue do certame Pérez Parallé
- Bases do certame [PDF]
- Susana Sánchez Arins: «Nom sou umha mártir: fago escolhas e escolho o reintegracionismo» [entrevista com a premiada na ediçom de 2008 do Prémio; PGL, 17/11/2008]
- Notícias sobre o poemário [de]construçom no PGL
