D.C. – Os livros de texto choram nestes dias ao se incluir umha das chocalhadas mais graves quanto a deturpaçom, destruiçom e insulto à nossa cultura e idioma. Mercê ao decretaço, que impom o castelhano na música, umha editora publicou um manual para a matéria destinado a 6º da Primária que inclui versom castelhanizada da popular A Saia da Carolina.
Este episódio foi desvendado polo blogue FeijóoMente, após terem constância do uso do manual no colégio da Laxe, em Marim. Aliás, trata-se da única cançom ‘galega’ que aparece em todo o livro.
Parece, portanto, que o objectivo nom é chegar ao trilingüismo, nem até o bilingüismo. Pudding de lacom con grillos é o paradigma, próprio do momento caótico no que nos atopamos, com um governo que, ademais de fustigar a língua do País, ainda nom tem claro qual é o idioma que tem que assassinar o galego.
Imagem de “La falda de Carolina”
Na seguinte ligaçom pode-se observar o extracto do livro no que podemos atopar a nova “joia” multilingüista, da qual laboratório ideológico de Feijóo deveria reclamar a patente… ou denunciar espionagem industrial. Como apontam de FeijóoMente, «onde se fala de galego, espanhol e inglês, exclui-se o galego e mantém-se o inglês». Isto pode ver-se na segunda folha, na qual as cançons em língua inglesa nom se traduzem. No entanto, fai-se versom em espanhol dumha cançom popular galega e emblemática. O acesso à nossa própria cultura popular para os nenos fai-se, destarte, através da língua espanhola. É apenas intentar roubar mais um círculo em que o galego é hegemónico, mas neste caso chegando ao limite mesmo da cordura.
Após ver isto, podemos imaginar versos ou cançons como “Airitos, aires”, “Por ir al baile, a Ramallosa, por ir al baile morena, perdí la moza” , “Olitas vienen y van”, “Anubía, anubía, y onde anubía no llueve” e outros sucessos de ontem e hoje, conhecidos por todos e que já estám dentro da memória colectiva da Galiza. “Larga noche de piedra” nos aguarda. Para isto se obriga as famílias a mudarem os seus livros em galego polos novos, umha medida que, por sinal, custará perto dos 6 milhons de euros.
+ Ligaçons relacionadas:
- TSJG nom suspende ‘decretaço’ e a Mesa denuncia «manipulaçom» da CRTVG [PGL, 17/09/2010]
- Nom aplicar o ‘decretaço’ é «cumprir a Lei», di a Mesa [PGL, 14/09/2010]
- Reclamam poder ministrar as ciências em galego e contratar o seguro escolar na nossa língua [PGL, 03/09/2010]
- A Mesa pede à Junta que aclare se vai gastar um milhom de euros em propaganda do decretaço [PGL, 07/04/2010]
