PGL – O Grupo Parlamentar do Bloco Nacionalista Galego (BNG) e agrupaçom loca de Marim de Queremos Galego denunciam a sistemática violaçom da legalidade vigente arredor da língua por parte da Autoridade Portuária.
Por este motivo, a agrupaçom local de Queremos Galego entregou ao Porto o simbólico prémio Língua de Pano, reconhecendo assim o «sistemático desprezo que esta instituiçom pratica com a língua galega, a vulneraçom da legalidade vigente na matéria, e a violaçom dos direitos linguísticos mas elementares».
Ligado com estes factos, o BNG perguntou no Parlamento acerca dos incumprimentos da Autoridade Portuária de Marim e das medidas que a Junta prevê adoptar a respeito. Os nacionalistas lembram que o Real Decreto espanhol 1465/1999, no capítulo II, relativo ao emprego de línguas cooficiais, recolhe a obriga de a língua galega figurar tanto nos impressos e documentaçom como na sinalética e cartazes.
O porto de Marim, classificado como de «interesse geral do Estado» fai parte da administraçom estatal na Galiza, e deve respeitar e acatar, portanto, a legalidade em vigor desde há onze anos. Porém, e apesar do tempo que se passou já, a Autoridade Portuária de Marim incumpre a Lei e nom respeita o nosso idioma. O galego está atualmente banido da sinalética, imagem institucional e outras indicaçons, havendo como únicos casos de bilingüismo o espanhol-inglês.
Por isto, o BNG pediu à Secretaria Geral de Política Lingüística, em aplicaçom do Plano Geral de Normalizaçom da Língua Galega e da sua própria razom de existir, exigir à Autoridade Portuária de Marim, ao ente público Puertos del Estado e ao Ministério espanhol do Fomento a correcom deste modo de agir.
+ Ligaçons relacionadas:
- Junta ignora perguntas do BNG a respeito das campanhas de galeguizaçom de nomes e apelidos [PGL, 08/07/2010]
- ‘Castrapo’ em Meteogalicia e toponímia deturpada na EGAP [PGL, 25/06/2010]
- A Junta incumpre novamente a legislaçom lingüística [PGL, 21/06/2010]
- Junta defende comunicaçons em espanhol às empresas «porque a maioria som de fora» [PGL, 17/06/2010]
- Reclamam o direito a realizar a declaraçom da renda em galego [PGL, 04/06/2010]
- BNG denuncia exclusom do galego na rotulagem do centro de saúde de Outeiro de Rei [PGL, 27/06/2010]
