PGL Países Cataláns – A proposta de novos Estatutos que a Junta Directiva do FC Barcelona submeterá à aprovaçom da Assembleia de eleitores do próximo 19 de agosto tenciona introduzir diferentes cámbios na entidade entre os que se destaca o referente ao idioma.
O ponto em questom manifesta o «reconhecimento estatutário do catalám como língua própria do FC Barcelona e de utilizaçom normal e preferente em todas as actividades do Clube».
Desta forma, quando forem aprovados os estatutos, todos os actos oficiais do clube serám realizados no idioma próprio dos Países Cataláns. A medida atingiria as conferências de imprensa, anúncios por megafones, comunicaçons aos sócios, rotulaçom de cartazes, publicidade ou o tratamento oficial no estrangeiro, como já aconteceu na final da Taça de Europa.
O FC Barcelona, popularmente conhecido como Barça, tem-se destacado pola sua promoçom da língua e cultura catalás. O presidente do clube, o advogado Joan Laporta, explicava há poucos dias em Hollywood que o Barça é um clube catalám e nom espanhol, a uns actores caracterizados como o Bucha e Estica (o Gordo e o Magro).
Laporta, que nom quer pagar as portagens do espanhol e da espanholidade, causou grande controvérsia ao manifestar que as categorias inferiores do clube nom saltariam ao terreno de jogo quando forem chamados com o hino espanhol, pois o FC Barcelona já tem um hino próprio, com letra em catalám.
A polémica a este respeito surgiu no Algarve, onde se celebra umha das competiçons mais importantes em categorias inferiores a nível europeu. Após várias petiçons por escrito onde o FC Barcelona solicitava que nom soasse o hino espanhol, os ouvidos surdos que deu a organizaçom provocárom que os jogadores abandonassem o campo de jogo com os primeiros acordes. Com a mesma polémica por dous anos consecutivos, a entidade decidiu que o clube nom concorresse mais na referida competiçom.
Na mesma linha do anterior, tem-se falado da politica interna do clube a respeito da promoçom da língua própria dos Países Cataláns, para que todos os seus jogadores possuam competência plena em catalám, e assim ficou evidenciado na celebraçom dos últimos títulos, onde a maioria dos jogadores usárom o catalám para se dirigir ao público do Camp Nou. No PGL já destacámos o caso do brasileiro Sylvinho, quem falou na íntegra em catalám durante as suas intervençons nas celebraçons dos últimos títulos.
Com esta defensa irrenunciável do idioma próprio, O FC Barcelona já conseguiu factos de grande importância, como o facto de que na última final da Champions League de futebol, em Roma, entre o FC Barcelona e o Manchester United, o catalám foi um dos três idiomas oficiais, e assim, tanto a documentaçom da UEFA quanto as indicaçons por megafonia ou a conferência de imprensa fôrom realizadas em catalám, ademais de italiano e inglês.
Situaçom na Galiza
Por enquanto, a situaçom nos clubes profissionais na Galiza é bem diferente. O Desportivo da Corunha, a equipa com mais títulos e reconhecimento internacional, realiza todas as suas comunicaçons em castelhano. Além do mais, a página web oficial e o seu jornal estám na íntegra em espanhol.
Por sua parte, o Celta de Vigo, após vários anos de marginalizaçom do galego, começou nos últimos tempos a apostar timidamente na língua galega. Recentemente o clube viguês apresentou umha nova web oficial, na qual já aparece a língua galega entre as escolhas possíveis, se bem no terceiro lugar, baixo do inglês e do castelhano.
+ Ligaçons relacionadas:
