Joám Manuel Araújo
A revista Longa Lingua, da Mesa pola Normalización Lingüística, oferece no número 19, correspondente ao verao deste ano, as habituais secçons de notícias, umha entrevista sobre a música Guadi Galego, reportagens muito aliciantes a respeito da divulgaçom da lusofonia em centros de ensino galegos; ou umha interessante análise de dicionários galegos realizada por Robert Neal Baxter, professor da Universidade de Vigo, em que evidencia a sua surpresa polo “nesgo rancio” com o que se elaboram estes produtos.
Há dous trabalhos, os mais compridos, que sobressaem especialmente neste volume. Um é o de Roberto Samartim1, professor da Universidade da Corunha e membro do Grupo de Investigaçom Galabra da Universidade de Santiago, intitulado “O Princípio da inércia. A fabricaçom de possibilidades no final do tardofranquismo”, em que parte de que “as estratégias de superaçom do alegado ‘conflito lingüístico’, em que os grupos defensores da primazia social do galego se oponhem aos partidários de manter a preeminência do castelhano, as alternativas colocadas para a fixaçom dum código estándar para a língua galega e a natureza da relaçom entre os modelos lingüísticos da Galiza e Portugal, constituem alguns dos principais elementos de debate entre os diferentes agentes e grupos actuantes no sistema cultural galego tanto nos últimos anos da ditadura franquista como na actualidade”. A elaboraçom de propostas ortográficas por parte do Grupo Galaxia, da Real Academia Gallega e do Instituto de la Lengua Gallega da Universidade de Santiago; a posiçom de grupos políticos como o Partido Socialista Galego, a Unión do Povo Galego e o Partido Comunista Espanhol na Galiza; ou a intervençom de Rodrigues Lapa e a polémica com Ramón Piñeiro, som elementos que se analisam no artigo, que ocupa seis páginas da publicaçom, e em que reproduz documentos muito valiosos para entender melhor os acontecimentos. Samartim finaliza fazendo referência à primeira Lei de Newton, também conhecida como princípio da inércia, segundo a qual quando a resultante das forças que actuam sobre um corpo for nula, esse corpo permanecerá em repouso (ou em movimento rectilíneo uniforme), por entender que se pode aplicar ao resultado desse período, que ele estuda de maneira tam acertada, atraente e inovadora.
Outro trabalho que merece especial destaque é a unidade didáctica “Escrever e ler em português”, de Cilha Lourenço Módia, também professora da Universidade da Corunha, quem em sete páginas e três liçons orienta para começar a ler e a escrever português, com actividades muito atractivas, e com indicaçons para ouvir textos e complementar as suas propostas através da Internet. Inclui exercícios e solucionário, e exprime umha concepçom da língua que parte do Galego-Português medieval e chega à Lusofonia actual, com muitas referências de interesse para introducir os interessados na produçom e na compreensom oral e escrita.
Este número de Longa Lingua, que se vende a 4 euros, tem 38 páginas, com apresentaçom atractiva, e evidencia um grande esforço para colocar no mercado umha revista muito recomendável, que de regra reserva espaço para a lusofonia nas suas páginas, e que neste número resulta de especial acerto.
Compostela, Novembro de 2008.
Notas:
1 Samartim informa que este artigo “recolhe, no básico, a comunicaçom “Conflito Sócio-Lingüístico, Código e Sistema Intercultural Galego-Luso-Afro-Brasileiro na Galiza: A Fabricaçom de Possibilidades na Década de Setenta”, apresentado ao IX Congresso Internacional da Associação Brasileira de Literatura Comparada (Abralic), celebrado em Porto Alegre em Julho de 2004.
