PGL – Como já aconteceu no mês passado, e já antes noutras ocasions, a Junta da Galiza insiste em atribuir a simples «erros» o envio de comunicaçons em espanhol ou o uso de toponímia deturpada. Desta vez, seria um erro o que provocou que a Conselharia da Sanidade deturpasse os nomes de lugar do País.
O departamento sanitário respondeu por fim umha pergunta formulada em setembro no Parlamento acerca da da exclusom do idioma galego e da toponímia oficial, única legal, nos pregos de prescriçons técnicas e Jurídicas para a privatizaçom do Serviço de Cita Prévia Telefónica.
A documentaçom estava redigida na íntegra em espanhol, e além de nom respeitar a toponímia, tampouco se respeitou a a denominaçom oficial das instituiçons públicas galegas: “Servicio”, “Consejería” ou “Junta de Galicia” som alguns exemplos. O Serviço Galego de Saúde (SERGAS) é a entidade responsável destes documentos, e depende directamente da Conselharia da Sanidade, que foi a que deu resposta.
Apesar da gravidade dos factos, do departamento autonómico limitam-se a dizer o seguinte:
A Conselharia da Sanidade utiliza de forma habitual o idioma galego para toda a documentaçom e comunicaçom. Nalguns casos é preciso dispor/publicar umha versom em castelhano, e nom sempre é possível garantir que nom se produza algum erro.
A resposta de Sanidade finaliza aí, e nom se dam explicaçons acerca das causas desses erros, nom se valoriza se o procedimento atual é o correto ou se preveem melhorar o protocolo de atuaçom para impedir novos «erros».
+ Ligaçons relacionadas:
