PGL – A Galicola, o projeto galego de economia social que destina todos os lucros da venda do refresco à normalizaçom da língua, convoca por terceiro ano consecutivo o Concurso Ângelo Casal.
Durante todo o ano, os 5% das vendas do refresco engrossarám o Fundo polo Galego, que será o prémio a entregar ao projeto normalizador com mais votos. O projeto ganhador conhecerá-se no 17 de Maio, Dia das Letras Galegas. O prazo de apresentaçom de candidaturas ao Concurso rematará a 31 de janeiro de 2012. Nessa data publicarám-se as candidaturas aceites. Todas as candidaturas deverám ser enviadas ao correio eletrónico info[arroba]galicola.org, e serám aceites as que cumpram as seguintes condiçons:
-Nom se aceitarám candidaturas de empresas com ánimo de lucro.
-Nom se aceitarám candidaturas de entidades que empreguem o espanhol.
-Nom se aceitarám candidaturas de entidades que promovam valores reacionários como o racismo ou o sexismo.
-Nom se aceitará mais de umha candidatura por entidade.
-Nom se aceitarám candidaturas de entidades que tenham ganhado o prémio o ano anterior.
-As candidaturas entregarám à Galicola umha apresentaçom do destino a que dedicarám o prémio, com extensom nom superior à duas folhas. Essa apresentaçom será divulgada nesta página web para o seu conhecimento polos participantes no Concurso.Eleiçom dos projetos ganhadores.
No 31 de janeiro publicará-se a listagem de candidaturas admitidas por Galicola, e exporám-se os seus projetos na página web da Galicola. O Concurso resolverá-se por votaçom popular. De 31 de janeiro a 1 de maio cada consumidor de Galicola poderá votar polos projetos que prefera, enviando umha etiqueta do refresco com o seu voto. Nom há limite aos votos que cada pessoa queira enviar. Poderá-se votar tanto por correio postal, quanto em urnas instaladas em centros sociais e locais por todo o país.
Dous anos financiando projetos normalizadores
No passado Dia das Letras proclamárom-se vencedores do Concurso Ângelo Casal duas associaçons culturais que mantenhem dous centros sociais no sul da Galiza, a associaçom cultural A Revira de Ponte Vedra, e A Revolta do Berbés, de Vigo. Repartírom entre as duas os 644 euros que acumulou o Fundo polo Galego em 2011. A primeira candidatura recebera 758 votos, e a segunda 694. Apresentaram a sua candidatura outros projetos, como a Liga Nacional de Bilharda, a AC Semente Vermelha de Vigo, a Escola Popular Galega, a Associaçom Cultural Bieito Fandinho de Messia, Galiza Contrainfo e a Associaçom Galega da Língua.
Em 2010, primeiro ano que se convocou o Concurso Ângelo Casal, venceu a candidatura da Mocidade pola Língua, que levou os 356 euros que nesse ano juntara o Fundo polo Galego. Apresentaram-se, aliás, a Associaçom Galega da Língua, a A.C. Foucelhas de Ordes, a Escola Popular Galega, e a Gentalha do Pichel de Compostela.
Cada vez mais prémios e candidaturas
O Concurso Ângelo Casal mantém umha linha crescente que esperamos manter: na primeira ediçom apresentárom-se cinco projetos e a quantia do prémio ascendeu a 356 euros; neste ano que remata, apresentárom-se oito projetos e o prémio quase se duplicou, chegando a 644 euros.
+ Ligaçons relacionadas:
- AC A Revira e AC A Revolta, ganhadoras do Concurso Ângelo Casal 2011 [PGL, 09/06/2011]
- Oito projetos normalizadores concorrem este ano ao Prémio Ângelo Casal [PGL, 03/05/2011]
- Galicola: Mocidade pola Língua ganha prémio Ângelo Casal [PGL, 31/05/2010]
- Segunda ediçom do Certame Ângelo Casal [PGL, 23/12/2010]
- Aberto o prazo para apresentar candidaturas e projectos ao concurso Ángelo Casal [PGL, 01/10/2009]
