PGL – A Sociedade Cultural e Desportiva (SCD) do Condado organiza a partir da sexta-feira, dia 31 de agosto, a XXVI ediçom do seu Festival da Poesia, que tem como eixo vertebrador o lema «Capitalismo é um facto, revoluçom um direito».
Exposiçons, projeçons, recitais e outras atividades vam estar relacionadas com essa temática, com a qual a SCD visa denunciar a «farsa» e a falta de humanidade do sistema económico vigente.
Como indicado, o evento inicia na tardinha da sexta-feira com exposiçons e projeçom de audiovisuais. Às 22h30 começa a Noite nas Minas com a atuaçom de Sés. Esta convocatória é a única com aforo limitado, já que se celebra dentro das Covas de Dona Urraca. Os bilhetes podem-se reservar no endereço de eletrónico scdcondado[arroba]scdcondado.org. Depois do concerto haverá repichoca no campo da festa.
No sábado, 1 de setembro, as atividades começam de manhá com um passa-ruas a cargo de Nos Chamam, o Aberto de Bilharda da Poesia, e a feira de artesanato e associaçons. Também de manhá, na Casa do Conde, haverá umha mesa redonda com representantes sindicais para debater sobre o assunto que centra esta ediçom do Festival.
Na tarde do sábado os pequenos e pequenas serám os protagonistas com a Festa Infantil (desde as 17h na zona das muralhas). Às 19h30 projetarám-se as curtas premiadas no Festival de Cans. O Festival Poético-Musical começa às 21h, e apresentarám-no Clara Gayo e Íria Pinheiro. Nele darám amostras do seu trabalho poético Daniel Salgado, Xiana Arias, Roi Vidal, Eduardo Estévez, Ramiro Vidal, Susana Sánchez Arins, Gonzalo Hermo, Silvia Penas e Claudio Rodríguez Fer. As suas leituras misturarám-se com as atuaçons do Sonoro Maxín, Cuchufellos, Sacha na Horta e Dios Que Te Krew.
Como cada ano, a SCD edita umha compilaçom de textos dos e das poetas participantes que se poderá adquirir nos dias do Festival. Ainda, disponibiliza todo tipo de serviços para o público, como campismo ou duches, todos de graça.
+ Ligaçons relacionadas:
- O Festival da Poesia no Condado homenageia as luitas feministas na sua XXV ediçom [PGL, 02/09/2011]
- XXIV Festival da Poesia: língua e serviços em mao comum [PGL, 02/09/2010]
- XXIII Festival da Poesia: a construir a necessária alternativa [PGL, 04/09/2009]
- Esta semana começa a XXII ediçom do Festival de Poesia do Condado [PGL, 01/09/2008]
- Site web do Festival de Poesia do Condado
