PGL – A Federaçom Galega de Municípios e Províncias (FEGAMP) e a Fundaçom Manuel María assinárom o convénio que permitirá a criaçom da Casa Museu Manuel Maria e o protocolo de actuaçom para realizar actividades culturais na mesma.
O convénio permitirá, por umha banda, a realizaçom de actividades nos concelhos relacionadas com a promoçom e desenvolvimento da cultura e a língua galega e, polo outro, contribuir à aquisiçom por parte da Fundaçom, da casa natal de Manuel Maria para converte-la em Casa Museu do escritor da Terra Chá.
Na actualidade, a casa natal de Manuel Maria está habitada polo irmao e a sua família, com quem a Fundaçom já chegou a um princípio de acordo para a construçom dumha nova morada e acondicionar como museu a conhecida como Casa de Hortas, em Outeiro de Rei.
Entidades locais de forte vencelho com o escritor como as deputaçons de Lugo e da Corunha, além do concelho de Monforte, já amossárom o seu apoio à dedicaçom da casa natal do poeta a museu e a sede do seu legado cultural. O convénio permite estender o projecto ao conjunto do país, na medida em que a FEGAMP se compromete a difundir e promover a adesom a este convénio entre as entidades locais.
+ Ligaçons relacionadas:
- Projecto para dar em andamento a Casa-Museu Manuel Maria [PGL, 22/06/2010]
- Manuel Maria terá casa-museu [PGL, 20/04/2010]
