PGL – Há umha semana foi inserido no site Galegolab um novo projeto que procura pessoas voluntárias para o levar para a frente. Trata-se de procurar erigir nas comarcas do país amilhadoiros com pedras que levem inscrita umha palavra galega escolhida pola pessoa participante.
Em todas as fases do desenvolvimento será umha obra coletiva, coordenada por umha equipa em cada comarca que será a que decidirá o projeto definitivo, incluindo a eventual determinaçom da temática lingüística e/ou simbólica do amilhadoiro concreto.
O objetivo desta proposta é «gerar um ato de reflexom e afirmaçom individuais e coletivas». Pretende-se que todo o processo (conceçom, desenvolvimento e execuçom) mantenha esse caráter comunitário. A idéia básica é que os participantes depositem (num dia e um lugar sinalados), como numha romaria, umha ‘pedra-palavra’, umha pedra decorada na qual inscreveram umha palavra galega (escolhida segundo uns critérios previamente estabelecidos), para formar e conformar o amilhadoiro, dando-lhe a forma e aspeto previamente definidos.
Amilhadoiro em Santo André de Teixido
A partir desse fundo comum, o projeto permite variadas possibilidades em cada um dos seus elementos ou fases, que desenvolverám o significado e os valores encarnados polo conjunto da obra.
Aliás, a iniciativa consente e mesmo exige o melhor uso das chamadas TIC. A criaçom de microblogues pessoais (ou o que determinarem os coordenadores) nos quais ‘trabalharem’ sobre a palavra, a pedra, e o texto e motivos da decoraçom. Poderám receber mensagens de ajuda ou simples comentário. O participante poderá fazer constar as suas fontes, onde conseguiu, etc.
+ Ligações relacionadas:
