PGL – A Conselharia da Economia e a Indústria da Junta da Galiza, dirigida por Javier Guerra, continua particular batalha do governo galego contra a toponímia legal e oficial da Galiza publicando no DOG traduçons quase identificáveis.
No passado 29 de Junho, o departamento autonómico publicou umha listagem de minas na província de Ourense, cujas licenças pretendem volver levar a concurso público após estas expirarem. Até em 20 casos a toponímia aparece deturpada, com traduçons que constituem umha clara violaçom da legalidade vigente, e que amossam a desleixo das instituiçons políticas galegas com as denominaçons legais e oficiais do País.
Juncal de Espadañedo (Junqueira de Espadanedo), El Bollo (Bolo), La Vega (Veiga), Colina de Miño (Castrelo de Minho), Colina del Valle (Castrelo do Val), La Calle (Rua) ou La Bolla (Bola), Vereda (Verea), Pobla de Trives (Póvoa de Trives) e Finca (Leiro) som nove dum total de vinte denominaçons que aparecem no Diário Oficial da Galiza (DOG) em forma de traduçom directa e, nalguns casos, aleatória, apresentando formas híbridas que aprofundam numha atitude de passividade e hostilidade com a toponímia galega.
Estes casos repetem os erros cometidos há quatro meses, quando Roberto Varela, conselheiro da Cultura, empregou num acto as denominaçons Desván de los Monjes e Toro no lugar de Sobrado dos Monges e Touro, que atribuíram a um erro à hora de traduzir o texto mediante um programa informático.
Mais grave é o facto de a própria Junta ter assumido «erros» toponímicos numha ediçom anterior. Porém, no escrito de correcçom, o texto tornou a ser redigido com nomes do País deturpados, como nos casos de Villardevós, Villamartín, San Cristóbal de Cea e Monterrey.
+ Ligaçons relacionadas:
- De Desván de los Monjes a La Calle [Xornal de Galicia, 19/07/2010]
- A Junta incumpre novamente a legislaçom lingüística [PGL, 21/06/2010]
- Junta defende comunicaçons em espanhol às empresas «porque a maioria som de fora» [PGL, 17/06/2010]
- Reclamam o direito a realizar a declaraçom da renda em galego [PGL, 04/06/2010]
- Aparece o vídeo no qual Roberto Varela inventa o concelho de ‘Desván de los Monjes’ [PGL, 08/03/2010]
