Chamando às portas do Céu

Carlos C. Varela
27 de Fevereiro de 2018

Carlos C. Varela
27 de Fevereiro de 2018
sem comentários

Partilhar

Bairro do Paraíso, em Ordes

O Paraíso é o bairro que medrou nas últimas décadas por volta do Grupo Escolar, com o CEIP Castelao e o IES nº 1 de Ordes. Como o Pinheiro, é umha zona de mestizagem rururbana, umha aldeia engolida polo asfalto, onde os tractores convivem com os sinais de tráfico e os professores chegados das cidades com os indígenas que aproveitam as horas livres para ir às truitas ou aos cogumelos. A vizinhança do Paraíso é o exemplo perfeito do que Ramom Lôpez-Suevos chamou “proletariado simbiótico”: trabalhadoras que ao rematar a jornada no têxtil pegam no sacho ou vam à erva. A concentraçom de estudantes chegados de toda a comarca favoreceu a emergência de um ecossistema de pequenos comércios, sobretudo cafetarias, bares-ultramarinos e papelarias-livrarias, que dam muita vida ao bairro. A posterior construçom do pavilhom desportivo ainda insuflou mais movimento e, ademais, um referente identitário bairral com elementos contra-culturais: o clube de hóquei a patins, desporto de hegemonia lusófona e catalá.

Um topónimo tam pretencioso como o do Paraíso deu pé a muitas brincadeiras, mas qual é a sua origem? Etimologicamente, a palabra é um descendente semiculto do latim paradisu(m), que à sua vez viria do grego parádeisos, “parque ou finca fechada”, à maneira dos grandes espaços amuralhados como o que a Bíblia di (Gênese, 2, 8-15) que era o Paraíso Terrenal onde moravam Adám e Eva até serem despejados pola ira divina. Este Paraíso da tradiçom bíblica deve-se inspirar no pairidaeza persa, o grande jardim amuralhado onde o rei Gerges se divertia, qual Bourbon, caçando leons[1].

Rua Paraíso no bairro do mesmo nome em Ordes

Há também Paraísos em Carral, Berdilho (Carvalho) ou Íria Flávia, onde os mais velhos lembram que, efeitivamente, ali houvo unha grande finca fechada justo onde hoje se acha umha importante indústria madeireira, à beira do Ulha. Também lhe chamavam Paraíso, no Códice Calistino, à praça situada na porta Norte da Catedral de Santiago, sinalando que ali se vendiam mochilas, correias, cintos e todo tipo de ervas medicinais.

Em 1346, Francesco Petrarca escreveu um pequeno tratado, De Vita Solitaria, aginha traduzido a outras línguas europeias. Nele situava o paraíso terrenal numha África Oriental atravessada por rios cristalinos em que se banhavam as mulheres para ficarem grávidas, sem homens nem guerras. Precisamente, nessa costa oriental de fala galega acham-se as Ilhas do Paraíso, pertencentes a Moçambique e defendidas polo Parque Nacional de Bazaruto. Estaria ali o paraíso antipatriarcal de Petrarca?

Quem quijo ver o Paraíso com os seus próprios olhos foi Amaro, santo favorito do poeta Ramón Cabanillas, quem ao jeito irlandês viajou de barco até ao Céu. Ao chegar a umha ilha topou nela com umha enorme porta de prata: a mesmíssima entrada do Paraíso. Tras assejar por ela durante o que ele considerou uns segundos, Amaro regressou à praia onde deixara a gamela para voltar à Terra. O homem nom podia dar crédito ao que se encontrou: Sanamaro, umha cidade construída durante os novecentos anos de tempo real que Sam Amaro estivera contemplando o Paraíso[2]. Haverá quem diga que esse Sam Amaro era o lugar de Rodis do mesmo nome.

Outro Santo galego que atingiu o Nirvana foi Ero de Armenteira, protagonista de umha formosa lenda que Filgueira Valverde estudou com erudiçom medievalista, mas que Castelao preferia como desafogo da frustraçom política face à intransigência espanhola durante a luita pola República. “Se quixeramos diferenciar o espírito galego do espírito catalán” –escrevia no Sempre em Galiza– “diriamos que están representados nas lendas de Don Ero e do Padre Navarrete. Nós somos o monxe que ficou en éxtasis polo canto cun paxaro: eles son o monxe que mandou calar os paxaros para entregarse á meditación”.

Notas:

[1] F. Cabeza Quiles, Toponimia de Galicia, Vigo, Galaxia, 2008, págs. 187-188.

[2] X. L. Méndez Ferrín, Consultorio dos Nomes e dos Apelidos Galegos, Vigo, Xerais, 2007, págs. 211-212.