PGL – O ex porta-voz nacional do BNG, Xosé Manuel Beiras, sai em defesa do «seu» Ricardo Carvalho Calero ante as críticas feitas públicas em datas recentes por Ramón Loranzo, co-fundador do ILG, reproduzidas há uns dias no Portal.
Para defender Carvalho, Beiras bota mão da transcriçom de umha conversa de há umha década com Francisco Pillado e Miguel Anxo Fernán Vello, afirmações que ainda mantém «ao pé da letra». Nestas reflexões, o antigo líder nacionalista defende o valor «moral» do inteletual ferrolano e desvenda como e por quê acha que se produziu a progressiva ocultaçom da sua figura.
A seguir transcrevemos —adaptando a ortografia— parte das afirmações de Beiras, divulgadas por Altermundo:
Carvalho era un out-sider na universidade de aquela altura, e mesmo, para a gente mais conspicuamente pertencente ao stablishment académico-universitario, resultava simplemente um intruso. Carvalho tinha a carreira de letras ademais da de direito, como é sabido […]. Mas nom chegara à cátedra de galego na Faculdade de Letras compostelana através do curriculum usual, e mesmo obrigado, para facer carreira docente na Universidade […]: formar-se dentro de algumha das “escolas” encabeçadas por […] autoridades académicas nos âmbitos da filologia românica, que “naturalmente” radicavam en Madrid ou Salamanca. […] desde que chega[ra] de catedrático à Faculdade de Filologia Constantino García, que nom era galego nem se formara sequer inicialmente na Galiza, o círculo galaxiano, e nomeadamente Piñeiro e García-Sabell, começa[ra] a desenvolver umha operación de captaçom de Constantino, de assíduo cultivo do seu ego, que aginha desemboca[ra] num notório processo de promoçom deste personagem […]. […] tratava-se de estabelecer nela [na Universidade] cabeças de ponte para chegar a conquistá-la e galeguizá-la. Mas aginha derivou, em detrimento de Carvalho, numha posta em contrastaçom de Carvalho, o out-sider indígena, com Constantino, o pied-noir con pedigree académico comme-il-faut. E sobretudo, acabou aginha por derivar num corrosivo e soturno processo de deterioraçom do prestígio e da solvência científico-inteletual da obra de Carvalho […]
+ Ligações relacionadas:
- «O Meu Ricardo Carvalho Calero», reflexões de Xosé Manuel Beiras em Altermundo.org
- Ramón Lorenzo, co-fundador do ILG: «Para ter umha língua de mais habitantes temos o castelhano, que o sabemos falar melhor» [PGL, 01/06/2011]
