Altamente

Carlos C. Varela
14 de Fevereiro de 2018

Carlos C. Varela
14 de Fevereiro de 2018
sem comentários

Partilhar

Lugar de Outeiro em Papucim (Frades)

Até treze lugares da Terra de Ordes se conhecem como o Outeiro, e estám nas freguesias de Bardaos, Beám –com o seu rego do Outeiro, que deita águas no Samo-, Berreio, Boado, Castelo, Galegos, Lançá, Messia, Monço, Papucim, Poulo e Vila de Abade. Também houvo um lugar do Outeiral em Encrovas, destruído por isso que Otero Pedrayo –um dos ilustres, como a Bela Otero, que levou este topónimo castelhanizado no apelido- denunciou como o “feudalismo eléctrico”. Trata-se, com certeza, de um dos topónimos mais frequentes[1]. O seu significado é transparente: denomina lugares elevados com umha palabra genuinamente galego-portuguesa que derivou da latina altariu. Embora outo, ‘alto’, já nom se usa na língua coloquial (exceptuando escritores de gosto arcaizante ou amigos das brincadeiras como Manuel Maria, que dizia amiúde “outamente”), permanece incrustado como adjetivo nos topónimos cerzedenses de Ribasoutas e a Gandarouta, assim como em Montouto (Cumbranos). Também na Picouta de Campo, pequena elevaçom de 371 metros de altura. Com idêntico sentido orográfico há duas aldeias, em Gesteda, Meirama e Bardaos, de nome a Picota, que para Cabeza Quiles também poderia ser “forma galega, con –ota como sufixo non proveniente do adxectivo latino altc”[2]. A outro lugar da Picota, no concelho de Maçaricos, umha etimologia popular assegura que fai referência a umha execuçom num suposto pelourinho durante a Francesada, teoria que desbota Cabeza Quiles preferindo o orónimo, tal e como devem ser os casos de Gesteda, Meirama e Bardaos[3].

No Outeiro de Poulo acha-se a igreja do Sam Giao, mostra do românico galego que também conta no remate da ábside com umha cruz cumial de estilo celto-britônico. Deve ser este Outeiro, por ser o mais próximo à vila, ao que os festeiros ordenses figerom a sua “gira ao bosque do Outeiro” nas Festas Patronais do verao de 1932[4]. Xavier Rodríguez Baixeras traduziu ao galego como O demo nos outeiros o fascinante livro de Cesare Pavese, intitulado, en italiano, Il diávollo sulle coline.

[1] Na toponímia menor há polo menos outro Outeiro em Chaiám.

[2] F. Cabeza Quiles, Os nomes da Terra, Nóia, Toxosoutos, 2000, pág. 317.

[3] Íbidem.

[4] “Fiestas patronales de Órdenes”, La Voz de Galicia, 16 de agosto de 1932, pág. 9.

Diferentes lugares co nome de Outeiro na comarca de Ordes

Lugar de Outeiro em Poulo (Ordes)

Lugar de Outeiro em Galegos (Frades)

Publicado em Aldeias de Ordes, 5,02,2018.

aldeias de Ordes

Máis de Carlos C. Varela

coronavirus

Altamente

Partilhar

Guia para pensarmos o coronavírus (II)

Guia para pensarmos o coronavírus (I)

Menino do bairro negro

Os cans da Contrarreforma

Contra a mentira

Charlton Heston ou o “cam galego”

A longa derrota do lobo…

Bravas como espinhas

Cestos e castros?