PGL – No passado fim-de-semana tivo lugar o acto de clausura das actividades do Projecto de Inovaçom Lingüística do IES Perdouro de Burela, o “Modelo Burela”, no contexto do II Encontro Letra Viva, organizado na vila marinhá.
Os actos começárom na biblioteca do Instituto em que nasceu o projecto, da mao da equipa de Normalizaçom e Dinamizaçom Lingüística, com a coordenaçom de María José Andión. Outras pessoas reconhecíveis da vida social burelá e da bisbarra figérom parte com a sua presença ou a sua achega em forma de palavra.
Às 18h visitou-se a Escola Infantil de Burela, umha das mais antigas do País e que aplicou desde os seus inícios o modelo de ensino agora materializado no Modelo Burela. A seguinte paragem foi o cemitério paroquial, onde se contemplárom os textos de diversas lápidas, algumhas das quais já formaram parte do documentário publicado há pouco mais dum ano. O acto central foi às 19h, com o II Encontro Letra Viva, em que participárom o regedor municipal de Burela, representantes de entidades desportivas, associaçons socioculturais e vicinais. Também estivo presente Cristina Rubal, vice-directora geral de Planificaçom e Dinamizaçom Lingüística da Junta da Galiza.
Umha vez exposta a memória de actividades do Projecto de Inovaçom Lingüística, os participantes visualizárom a projecçom da participaçom do lingüista hindu Anik Nandi numha das actividades do Modelo Burela e tributárom umha homenágem aos promotores do uso lingüístico normalizado nas áreas de desportos, música e as actividades comerciais, culminado com a leitura dos discursos por parte dos homenageados Sofía Prieto, Albano González e Rosana Carballés.
+ Ligaçons relacionadas:
- Modelo Burela: umha liçom de cinema e de senso comum sobre o uso das línguas [PGL, 09/02/2010]
- Um centenar de músicos protagonistas dumha missa multicultural [PGL, 21/03/2009]
- Primeiros resultados do modelo integrador [PGL, 26/02/2009]
