Maria Espantoso – A Junta da Galiza nom quer que depois do Verao haja umha campanha contra o novo decreto do galego que vai elaborar o Executivo autonómico, apesar de que o Partido Popular tem ido nos últimos tempos da mao de colectivos que reclamavam umha revisom do status legal do idioma do país.
Segundo o presidente, Alberto Núñez Feijóo, o Governo vai promover «um decreto no qual esteja a maioria da populaçom, e nom os 10%, como acontecia com o anterior». A Junta tem previsto apresentar um rascunho da sua proposta a PSOE e BNG em Setembro.
Do Executivo autonómico também se confirmou que o novo texto terá em conta o inquérito sobre o uso das línguas galega e castelhana que da Junta realizárom a pais e maes em Julho.
Feijóo afirma que procurará que o texto «seja de todos» e espera que depois do Verao nom haja nem umha campanha contra o texto, nem chamamentos de agentes sociais e políticos chamando à desobediência. Um desejo quando menos curioso, pois o PP regressou à Junta da mao de organizaçons e grupos de pressom que nom só reclamavam a derrogaçom do ainda vigente decreto do galego -aprovado polo Governo de coalizom BNG-PSOE-, senom que nalguns casos também chamárom à ‘insubmissom’. Mesmo no passado mês de Abril a própria Junta chegou a enviar instruçons aos centros, duramente criticadas polos sindicatos, com instruçons contrárias ao estipulado no decreto.
Segregaçom
Por outra parte, segundo recolhe o diário Xornal de Galicia, Feijóo nom descarta estudar a segregaçom do alunado por razom de língua sempre que assim lho solicite o conselheiro da Educaçom, Jesús Vázquez. Cumpre assinalar que o actual quadro normativo do nosso país nom permete esta possibilidade, explicitamente rejeitada no artigo 13.3 da Lei de Normalizaçom Lingüística («Os alumnos non poderán ser separados en centros diferentes por razóns da lingua. Tamén se evitará, a non ser que con carácter excepcional as necesidades pedagóxicas así o aconsellaren, a separación en aulas diferentes»).
+ Ligaçons relacionadas:
- Quadro legal do galego
- A Conselharia da Educaçom quer o novo decreto do galego para Setembro [PGL, 05/08/2009]
- Educaçom tira conclusons favoráveis às suas teses de um inquérito sem rigor nem garantias [PGL, 31/07/2009]
- A Mesa acusa o conselheiro da Educaçom de ter mentido [PGL, 28/07/2009]
- O manifesto pola hegemonia social do galego ultrapassa 600 apoios [PGL, 21/07/2009]
- O BNG denunciará perante a Unesco a vulneraçom dos direitos humanos e linguísticos do povo galego [PGL, 23/06/2009]
- Maré de reacçons contra a consulta sobre o uso do galego no ensino [PGL, 16/06/2009]
- Opiniões de uma professora [artigo de Adela Figueroa no PGL, 14/06/2009]
