PGL – Amanhá, quinta-feira dia 17 de dezembro, às 20h30, o local social da Agrupaçom Cultural Alexandre Bóveda acolherá um recital para celebrar o XXV aniversário do colectivo poético corunhês De amor e desamor, no que participarám autores como Miguel Anxo Fernán Vello, Manuel Rivas ou Lino Braxe.
No acto, que será apresentado por Consuelo Bautista, participarám membros da geraçom como Lino Braxe, Manuel Rivas, Miguel Mato, Xosé Devesa, Miguel Anxo Fernán Vello, Xulio López Valcárcel ou Xavier Seoane.
Colectivo De amor e desamor
A meados dos anos 80, um mercado editorial abafante propiciou a criaçom de diversos colectivos poéticos na Galiza como Alén ou Cravo Fondo. Assim, o colectivo poético De amor e desamor nasceu na Corunha, nos barracons de Riaçor próximos à antiga Faculdade de Filologia com o intuito de entrar no tecido editorial e perante a impossibilidade de aceder a título individual.
Definidos por Jasmina Rodrigues como «plumas cúmplices que nom partilhavam mais do que um momento histórico concreto e un lugar: A Corunha», conformárom o colectivo: Lino Braxe, Xosé Devesa, Miguel Anxo Fernán-Vello, Miguel A. Mato Fondo, Pilar Pallarés, Lois Pereiro, Manuel Rivas, Francisco Salinas Portugal, Xavier Seoane e Xulio L. Valcárcel.
Ainda, J. Rodrigues destaca: «Influídos por elementos da cultura popular como a música punk ou o cinema de série B, salientam-se entre outros méritos a inclusom de novas propostas temáticas de carácter intimista que rompem com a tradiçom social-realista anterior, a saber: tratamento do amor e do erotismo fronte aos conteúdos sociais, recreaçom no sentimento de nostalgia ou a criaçom de espaços íntimos, que suporám a primeira acreditaçom literária pública e institucional destes autores e, por extensom, da poesia dos 80».
O colectivo lançou ao prelo dous volumes De amor e desamor e De amor e desamor II publicados em 1984 e 1985 por Ediciós do Castro.
