PGL – A 21 de julho decorre em Narom o XII Festival da Terra e da Língua, evento organizado anualmente pola Fundaçom Artábria. O evento decorrerá no passeio marítimo de Júvia, em Narom, e a temática da XII ediçom será a oficialidade das seleçons desportivas nacionais.
A decisom é devido à «intensa campanha do espanholismo para nos meter polos olhos as suas seleçons, a sua bandeira e todo o imaginário negador da Galiza como realidade nacional, cultural e lingüística diferenciada», com o Euro de futebol (co-organizado pola Polónia e a Ucránia) e as Olimpíadas (Londres) como referentes.
Por esta razom, «a afirmaçom em primeira pessoa da nossa identidade, do nosso direito à existência, expressa-se nesta nova ediçom do Festival da Terra e da Língua através da reivindicaçom de seleçons desportivas próprias e com direito à participaçom em torneios oficiais de caráter internacional.», afirmam da Artábria.
No capítulo musical, os grupos que vam atuar no festival são Cuchufellos, Fracasados de Antemano, Trapallada, DZ Selectors, bem como o conhecido grupo basco Betagarri. Mas o programa é muito mais do que isso, haverá festa, música e desporto para reafirmarmos que a Galiza é umha naçom e que tem direito à existência em plenitude
A Artábria acaba de lançar um blogue no qual está disponível o programa completo, com horários e lugares; as colaboraçons escritas remetidas por Pilar Neira, Alexandre Costa e Ramiro Vidal; info sobre todos os grupos que neste ano atuarám no concerto e ainda sobre o debate, o festivalzinho… e também a informaçom necessária para chegar ao lugar do Festival, assim como sobre o espaço reservado para acampamento.
Por último, da Fundaçom Artábria indicam que é possível colaborar economicamente realizando achegas para o número de conta 2080-0226-61-3040022733.
Video do XII Festival da Terra e da Língua
(Ediçom: galizacontrainfo.org)
(Música: Trapalhada)
