PGL – Uma análise crítica do processo de folclorizaçom que sofre nas lojas do País o projecto político galeguista, ou seja, a sua simbologia, marcas e reivindicaçons políticas, incluída a língua, constitui um dos destaques mais chamativos do número 74 do periódico reintegracionista Novas da Galiza.
A capa do jornal completa-se com manchete principal para o Plano Eólico, assunto tratado criticamente na secçom A Fundo; bem como destaques para a análise assinada por Fernando Blanco Arce (responsável da Comissom Penitenciária da EsCULca), subordinada ao título «Direitos humanos, da propaganda governamental à realidade»; e as ligaçons nos postos mais altos do poder mundial entre política e narcotráfico.
Ainda, este número do periódico galego de informaçom crítica inclui a quinta entrega do suplemento ‘A Revista’, intitulado A Maré e os Mexilhons (foto-reportagem); com um trabalho de Xavier Groba (secretário do C.E. Maúxo) que alerta sobre o perigo que correm as monumentais covas do Folom; e mais umha colaboraçom humorística da Plataforma Seioque, com o trabalho «A Miss Espanha que berrou ‘Galiza Ceive’».
Mas ‘A Revista’ nom é o único suplemento que acompanha esta nova ediçom do Novas, pois o jornal oferece também o suplemento de iniciativas em marcha ‘Dito e Feito’. Este suplemento vem carregado de informaçom, com artigos sobre o novo projecto anticonsumista Sem um Cam, lançado em Ourense; a apresentaçom da associaçom Almuinha, colectivo ao serviço da criaçom e manutençom da nossa cultura em Marim; umha reportagem reflexiva sobre o Apalpador; actividades da rede Galiza Nom Se Vende; a constituiçom do Clube Alpino Faísca, vinculado ao local social viguês do mesmo nome; e, finalmente, umha entrevista a Maria Iglesias Vázquez, da Associaçom Cultural Brisas do Quenlho (Tordóia).
Igualmente, nas páginas do Novas da Galiza som publicadas opinions exclusivas assinadas por Carlos Calvo Varela, Rosa Enríquez, Pedro Alonso, Carlos Santiago e Leo F. Campos; à par das habituais colunas A Conjugar o Verbo Sexuar (Beatriz Santos), Língua Nacional (Valentim R. Fagim), Cinema para Pensar (F. Traficante) e Além Minho (Nuno Gomes).
E mais. Além de podermos acompanhar com diversas notícias e breves a actualidade galega, falando no campo internacional destaca neste número do jornal soberanista umha reportagem sobre os assentamento sarauitas em Tindouf; no cultural é denunciado o ruinoso estado em que se encontra o histórico Teatro Principal de Tui, local em que decorrérom os Primeiros Jogos Florais (1891) e onde Manuel Murguia pronunciou o seu primeiro discurso em galego em defesa do idioma; e no desportivo tenhem destaque o arranque do ano da Intifada Bilhardeira e da Liga feminina de trainhas, que ocorrerá no Verao.
