José Alberte Corral – O vindouro dia 18 de março, quarta-feira, nos locais da Fundaçom Caixa Galicia (Cantom Grande – Corunha), o Professor, tradutor e escritor, Henrique Harguindey Banet falará dentro do ciclo, Língua, Literatura e Naçom, organizado pola Agrupaçom Cultural O Facho. A sua charla versará sobre: «Testemunhas francesas sobre Galiza».
Henrique Harguindey Banet, sendo ainda estudante na Corunha, foi um dos fundadores da Agrupaçom Cultural O Facho. Durante a tirania franquista mantivo umha intensa vida política em contra da mesma que prolongou posteriormente durante muitos anos.
No seu quefazer cultural tem traduzido autores como: Paul Keineg, Jacques Prévert, Michel de Ghelderode, Víctor Hugo, Rabelais, Max Jacob, B. M. Koltès, Raymond Queneau, Boris Vian, e Ionesco, entre muitos outros e também do francês medieval. Entre as obras traduzidas para o galego podemos sublinhar: Tres pezas cómicas medievais, Historia de rei Kabul, O reiciño de Galicia, Gargantúa e Pantagruel, A escuma dos días, A cantante calva, etc.
Como autor tem publicado individualmente assim como em parceria, entre as quais: A saquetiña da lengua, Lerias e enredos para os máis pequenos, Antoloxía do conto popular galego (estas duas últimas junto a Maruja Barrio) .
Proximamente aparecerá, publicado pola Universidade de Santiago, La Galice, dez séculos de olladas francesas, que recolhe testemunhas e alusons a Galiza em textos franceses desde o século XII aos nossos dias.
