Como tantos utentes da Rádio e Televisom Galega observo e sofro a continua manipulaçom informativa, a progressiva privatizaçom da grelha televisiva e o permanente descumprimento da Lei de Meios Públicos. Também percebo umha rápida degradaçom da qualidade linguística que certamente nunca foi boa.
O desleixo dá para muito escrever, porém vou começar com um tema muito popular, a informaçom do tempo.
Na tabela a seguir, comparo algumhas formas correntemente usadas no português de Portugal, no galego que eu chamo tradicional (o que eu ouvim na família e noutras aldeias), o galego da TVG-RG e o castelhano.
| Português | Galego tradicional | Galego TVG-RG | Castelhano |
| Céu limpo | Céu limpo | Ceo despexado | Cielo despejado |
| Céu cinzento | Céu cinzento | Ceo gris/plomizo | Cielo gris/plomizo |
| Mudar o tempo/o clima | Mudar o tempo/o clima | Cambiar o tempo/o clima | Cambiar el tiempo/el clima |
| Vendaval | Vendaval | Surada/vendaval | Surada |
| Cheia | Chea | Riada/enchente | Riada |
| Alagar | Alagar/assulagar | Anegar/asulagar | Anegar |
| Terras ardidas | Terras ardidas | Terras queimadas | Tierras quemadas |
| Quarta à tarde | Quarta/miércoles à tarde | Mércores pola tarde | Miércoles por la tarde |
A listagem de castelhanismos nom tem paragem. Às vezes atingem a própria escrita como nas imagens que ficam embaixo (reparem na deturpaçom toponímica), ainda que maioritariamente som orais, como estas frases que reproduzo na norma da RAG.
- Desplómanse as temperaturas.
- É tempo de coller sombrilla e tumbona.
- Mala mar.
- Aumenta a auga embalsada.
- O anticiclón das Azores chegou para quedarse.
- Ventos huracanados.
- Aviso amarelo na conca do Sil.
- Alerta por calor na bacía do Taxo.
- Os datos das temperaturas dan escalofríos.
- A chuvia arrastrou mesas e sillas das terrazas.
- Algunhas nubes en medianías (fazendo referência à zona central da comunidade autónoma galega).
Ao contrário da família Pemán, as jornalistas atuais nom costumam utilizar ditados populares. O último que ouvim foi o decalque do castelhano “ceo empredrado, chan mollado”. Eu quero finalizar este artigo com os ditos que me aprendeu minha mãe: “céu escamento, ou chúvia ou vento” e “céu de lã, ou chove hoje ou chove manhã”.
