PGL – Amanhã, sábado dia 5 de novembro, a Associaçom Galega da Língua (AGAL) celebra no Museu do Povo Galego, em Santiago de Compostela, o ato comemorativo do 30º aniversário da entidade reintegracionista.
A receçom aos assistentes será às 11 horas, e a partir das 11:30 invervirám diferentes pessoas que explicarám nas suas próprias palavras diferentes aspetos da história da associaçom e da atividade realizada nas últimas três décadas. O ato encerrará contra as 13 horas com degustaçom de aperitivos e bebidas.
Por enquanto, já confirmárom a participaçom no ato perto de um cento de pessoas. Além disso, representantes de diferentes entidades também anunciárom a presença de representantes institucionais.
Cartaz dos 30 anos da AGAL
[prima aqui para alargar a imagem]
Homenagem a Estraviz e Montero Santalha
Na mesma data, mas já ao meio-dia, haverá umha homenagem aos sócios da AGAL e membros da Academia Galega Isaac Alonso Estraviz e José-Martinho Montero Santalha. Decorrerá a partir das 14h15 no restaurante O 16, mesmo ao pé do Museu do Povo Galego. Devido à lotaçom limitada, já nom é possível reservar vaga, e mesmo foi estabelecida umha lista de espera. Ao redor de meio cento de pessoas tributarám-lhes a sua admiraçom e afeto a estes dous vultos do reintegracionismo.
José Martinho Montero Santalha e Isaac Alonso Estraviz serám homenageados
Concurso para eleger novo logótipo
Também como parte das atividades do 30º aniversário da associaçom, o Conselho da AGAL promove um concurso para eleger o novo logótipo de entidade reintegracionista. As pessoas interessadas em participar têm até 17 de novembro para enviar as suas propostas.
O galego éMundial
Embora o de amanhã será o ato institucional do 30º aniversário da associaçom, o ato central do programa de atividades tivo lugar no verão, com a celebraçom do evento éMundial: toda umha semana de açons lúdicas e culturais em Santiago de Compostela que finalizárom com umha jornada de convívio e concertos. No festival participárom pessoas de diferentes países da Lusofonia que aproximárom a sociedade galega dos diferentes ‘sabores’ com que a nossa língua é falada polo mundo adiante.
+ Ligações relacionadas:
- Estraviz, Montero Santalha, e a internacionalidade da Língua Galega
- Entrevista a Isaac Alonso Estraviz [Galiza Livre, 04/11/2011]
- Restam menos de três meses do concurso para eleger novo logótipo da AGAL [PGL, 25/08/2011]
- AGAL, «contra-peso permanente para evitar a fossilizaçom que traz consigo o hiperdiferencialismo» [PGL, 18/07/2011]
- AGAL organiza o festival éMundial de 4 a 9 de julho [PGL, 17/06/2011]
- 2011 é o ano do 30º aniversário da AGAL [PGL, 09/02/2011]
