PGL – A Semente é um projeto autogerido educativo em galego para nenas e nenos de 2 a 6 anos em Compostela. É umha realidade com três anos de trajetória e configura-se como um dos projetos de transformaçom social mais destacáveis na atualidade. Neste terceiro ano de vida, organizam também o terceiro concerto em apoio ao seu projeto, que agardam seja tam multitudinário e emotivo como os dous anteriores.
Subordinado ao nome de “Sementes de Música” tenhem actuado em seu apoio artista de renome como Guadi Galego, Uxia Senlle, Uxia Pedreira, Xoán Curiel ou Narf entre outros. Domingo, 16 de março às 18h, nais e pais acompanhando as suas crianças e público em geral, poderám gozar em familia dos prestigiosos projetos musicais de Sés, Caxade e Davide Salvado.
Se algo podemos destacar de Sés é o seu enorme carisma e força pessoal, de sobra amosada em centos de concertos e actuaçons ao longo de toda a Galiza. Aos poucos e graças à transmissom boca-orelha, a sua intensa personalidade e honestidade na hora de se manifestar foi conquistando o público com um caudal de energia que chama pola uniom e o questionamento do establecido. A sua música leva-nos aos sons americanos, do blues aos ritmos latinos, repensados em galego e em feminino.
Caxade é o novo projeto pessoal de Alonso Caxade. Indie-folk cum arrecendo a música minimalista e a sons bucólico-pastorís da velha Europa. Música elegante, modesta e singela, surrealismo pós-modernista e discurso reivindicativo, metafórico e irónico. Foi indicado aos “Premios Mestre Mateo”, aos “Premios Opinión”, aos “Premios Galegos da Música” e venceu o “Certame Música Xove”. Em novembro de 2013 editou no selo cooperativo “Discos da Máquina” o seu primeiro trabalho discográfico “A Dança dos Moscas” com a banda formada por: Manu Paino (trompeta e carilhom), Manu Espinho (bombardino), Xosé Tunhas (bateria) e o próprio Alonso Caxade (voz e acordeom).
Davide Salvado interpreta do coraçom, em agradecimento a todas essas pandeireteiras e bailadoras velhas, mulheres fortes e anónimas, que ensinárom Davide a ser o que é. Os seus dous discos contam com aval de grandes artistas como Eliseo Parra, que produciu o seu primeiro trabalho “Arnica Pura”. Nos seus concertos a voz e as percussons tradicionais tenhem o protagonismo e conceito estético cumprindo um importante papel, sendo sempre cem por cem galego.
Todos os rendimentos deste concerto serám destinados ao projeto de Escolas de Ensino Galego Semente, umha iniciativa social, autogerida, sem ánimo lucrativo, impulsionada pola Gentalha do Pichel, que pretende conformar, junto com outros projetos semelhantes, as bases necessárias para a criaçom da Escola Nacional Galega onde a nossa lingua própria se consolide à vez que se cria um espaço de interculturalidade, formentando-se a importáncia do respeito a outras culturas, os princípios da coeducaçom, da laicidade, do assemblearismo, da interaçom com a natureza, do respeito pola auto-regulaçom da criança e da integraçom no contexto do seu bairro e da cidade.
Quem quiser colaborar e/ou gozar da música destes grandes músicos, pode adquirir os bilhetes em Miranda (Trás Salome 1) ou na Gentalha do Pichel (Sta Clara 21) anticipada por 10€ ou na bilheteira por 12€.
