PGL – Na passada segunda-feira, diversas pessoas, quer a título individual, quer em representaçom de diversas entidades normalizadoras, assistiram à assembleia aberta convocada pola MNL, que tivo lugar na Galeria Sargadelos de Santiago de Compostela.
Na reuniom, conforme informaçons a que tivo acesso o PGL, houvo quase tanta representaçom reintegracionista como isolacionista, expondo cada colectivo e mesmo algumhas pessoas individualmente, como vêem a situaçom linguística e cultural a partir de já, numha nova era política dominada na Galiza pola direita espanholista do PP.
Embora continuassem alguns velhos discursos, a voz reintegracionista tivo grande protagonismo, entre o ambiente geral de indecisom e pouca vontade de debate. Estivérom representados colectivos como o MDL, a Associação Pró-AGLP, Gentalha do Pichel, Nós-UP, Briga, Agir…
Em termos gerais, os representantes reintegracionistas defendérom a necessidade de dar forma a um outro modelo de língua, um modelo que, além de mais, tenha em conta a comunicaçom com outros países lusófonos, mesmo na procura de apoio internacional.
Ainda, foi defendido em termos gerais o desejo de umha futura manifestaçom vir a ser o mais ampla possível e nom como umha iniciativa da MNL a que outros grupos aderem, mas através de umha plafafoma nova e abrangente, na tentativa de conformar umha grande frente galeguista.
