Em dia 9 de janeiro Sermos Galiza informava que a Real Academia Galega ia assinar na quinta feira um convénio de colaboração com a Academia Brasileira de Letras. No dia seguir, David Lombao publicava no Praza Pública uma cumprida informação na que dava conta do ato e das explicações do Presidente da RAG, Vitor Freixanes.
O Presidente da RAG, para contextualizar a aliança, aderia deste jeito uma das ideias força, estratégia e palavras de ordem mais populares no reintegracionismo na última década:
“O galego non é unha lingua local, é unha lingua que forma parte dun proxecto internacional”.
No mesmo dia, o site da RAG dava em destaque detalhada informação do acordo:
A RAG e a ABL abren as portas a través deste acordo a potenciaren o intercambio de investigacións e manifestan o interese de levaren a cabo outros proxectos de colaboración en distintos eidos.
“Asinamos este protocolo coa vocación de iniciar un camiño de colaboración entre ambas as institucións para estreitar a relación entre a área cultural lingüística brasileira e a galega”, expresou Víctor F. Freixanes. “Na Real Academia Galega hai conciencia de que a lingua galega forma parte dunha familia onde están os irmáns de Portugal, do Brasil, de Angola, Cabo Verde, Mozambique… un territorio cheo de posibilidades tamén para o galego. Nós sempre dicimos que o galego non é unha lingua local, é unha lingua que forma parte dese proxecto internacional”, engadiu o presidente da RAG.
Com estas declarações, o presidente da Real Academia Galega, reforçava a importância do “acordo de amizade e colaboração” com a ABL. O Acordo formalizado, visa um horizonte de “projetos partilhados”, o que viria regularizar e explicitar o esquema no que já trabalham, segundo Freixanes, desde há tempo alguns membros da RAG desde os seus respectivos âmbitos e em colaboração com universidades e outras instituições do Brasil.
“Gustaríanos – destacou também Freixanes – que este fose o principio dunha colaboración estreita coa Academia Brasileira de Letras, que tivo como presidenta a unha das nosas académicas de honra, Nélida Piñon”
Marco Lucchesi também teve palavras de afecto para a sua predecessora no marco de uma visita que qualificou como “de relevo, histórica e sentimental”. O documento foi rubricado o 10 de janeiro de 2019 na sede da RAG, na rua Tabernas da Corunha.
As intervenções do presidente da Real Academia Galega, Víctor F. Freixanes, e do presidente da Academia Brasileira de Letras, Marco Lucchesi após o histórico acordo, foram disponibilizadas pela RAG no Youtube:
