PGL – Depois de que nesta semana a Mesa do Parlamento da Galiza aprovara nom debater a Iniciativa Legislativa Popular (ILP) promovida por Queremos Galego, a plataforma anunciou que continuará com a recolhida de assinaturas para a iniciativa.
Esta ILP visa garantir por lei os direitos lingüísticos no ensino e nas relaçons com as administraçons públicas, desenvolvendo o estabelecido na Lei de normalizaçom lingüística e no Plano Geral de normalizaçom da língua galega, aprovadas as duas por unanimidade pola Cámara autonómica.
Segundo Queremos Galego, nom pensam calar «por muito que Núñez Feijóo queira que a sociedade deixe de defender o galego», e estudam respostas judiciais contra a resoluçom da Mesa do Parlamento.
Para o colectivo, a nom admissom a trámite da ILP é mais umha amostra «do medo que o Partido Popular tem a que a sociedade expresse de qualquer maneira o seu apoio ao uso da língau própria e oficial do nosso País», chegando até o ponto de «utilizar e manipular de modo partidário instituiçons públicas como a Mesa do Parlamento».
Para poder apresentar na Cámra umha ILP, é necessário que conte com o apoio de 15 mil assinaturas. De Queremos Galego lembram que cumpriam este requisito, e que no caso de que tivera sido admitida a trámite, abriria-se um período de recolhida de assinaturas entre as pessoas com maioria de idade censadas na Galiza. «É a este debate que tem pánico o PP», assinalam, «já que evidenciaria que por trás do seu discurso o que se agocham som claras intençons de acabar com a língua galega».
+ Ligaçons relacionadas:
- Queremos Galego apresenta umha ILP no Parlamento [PGL, 08/02/2010]
