PGL Países Cataláns – A Generalitat da Catalunha estenderá por todo o território catalám umha iniciativa da Coordenadora de Associaçons pola Língua (CAL) que consiste em criar grupos de conversa de catalám entre imigrantes.
Xerrem (‘Parolemos’), que assim se chama o projecto, visa para integrar este colectivo na sociedade e fomentar a criaçom de umha cultura comum. Dirige-se aos imigrantes que desejem falar catalám mais fluidamente, mercê à colaboraçom de grupos de conversa liderados por pessoas que conhecem a língua e que trabalham voluntariamente.
Com o apoio da Secretaria pola Imigraçom, a CAL tenciona estender a iniciativa, que actualmente, e depois de um ano de funcionamento, concentra-se principalmente em Barcelona, mas conta também com presença noutras cidades e localidades do país.
Jordi Esteban, director do projecto, explicou que a missom fundamental de Xerrem é a criaçom de «umha cultura comum» que fomente a coesom social através da integraçom dos imigrantes e um «recíproco enriquecimento» na diversidade.
Esteban explicou que o programa cumpre com um triple objectivo, «fomentar o uso social do catalám, promover o entendimento entre autóctones e imigrantes e acolher as pessoas chegadas recentemente».
Pola sua banda, o secretario para a Imigraçom, Oriol Amorós, defendeu o catalám como «umha língua a favor da autonomia das pessoas». Amorós fizo especial finca-pé no papel integrador da língua e acrescentou que a Catalunha, como país, tem um elemento de identidade que é a língua. «Se falas catalám, já és dos nossos», sentenciou.
+ Ligaçons relacionadas:
- Voltárom as conversas galegas [PGL, 05/09/2009]
