PGL – Aurora Marco, catedrática de Língua e Literatura Galega na Faculdade de Ciências da Educaçom da USC, autora de Foula e ronsel: os anos xuvenis de Carvalho Calero (1910-1941), estará hoje, quinta-feira, às 20h30, no C.S. O Pichel (Compostela) para falar sobre a vida e obra do professor ferrolano.
A figura de Carvalho Calero é imprescindível para compreender a evoluçom do galeguismo e do nacionalismo galego desde os anos 30. Antes da guerra, salienta o seu ativismo no Partido Galeguista e no Seminário de Estudos Galegos ou a sua participaçom na redaçom do Estatuto de Autonomia. Durante a guerra, a defesa da república levou-no à prisom, primeiro, e a um prolongado afastamento forçado do ensino, depois.
Nas últimas décadas do Franquismo a sua mao estivo atrás de praticamente todas as tarefas inaugurais de que precisava a cultura galega para encarar com sucesso o fim deste regime político: escreveu o primeiro romance em galego, a primeira história da literatura e a primeira gramática galegas e ainda elaborou diferentes propostas de normativizaçom do galego desde os anos 70 até 80.
A partir daí, a defesa do reintegracionismo fará com que deixe de ser umha figura unanimemente celebrada. O mundo cultural que a partir de 82 desfrutou do descanso institucional tentou silenciar a sua obra e distorcer a sua biografia para o apagar da lista dos bons e generosos. Nom parece que vaia consegui-lo, e muito menos com trabalhos como o de Aurora Marco a recuperar a sua figura de todos os pontos de vista: umha conferência imprescindível para compreender a biografia de Carvalho Calero.
Cartaz do evento
[Clicar em cima da imagem para ampliar]
