PGL – PSOE e PP impediram no passado dia 17 a aprovaçom de uma moçom de Esquerra para instar o Congresso dos Deputados a normalizar o uso das línguas oficiais distintas ao castelhano no mesmo Congresso. A moçom, defendida por Joan Tardà, foi finalmente chumbada por 315 votos en contra e apenas 25 a favor.
Esquerra negou-se a retirar a demanda sobre o uso do catalám ao Congresso tal como exigia o PSOE para aprovar o resto dos pontos da moçom, entendendo que os direitos linguísticos som irrenunciáveis, facto que provocou desemascarar o PSOE. Esta formaçom tem adiado durante anos a resoluçom deste conflito argumentando razões regulamentares.
Finalmente, o grupo socialista tivo que optar entre permitir o uso do catalám, éuscaro e galego no Congresso ou o impedi-lo, optando pola última opçom, também apoiada polo PP. «Nós nom enfraqueceremos, som eles que têm decidido solenemente proibir o uso do catalám. Som vocês quem nos abocan ao conflito», disse Joan Tardà a partir da tribuna.
Segundo noticia Galiciaé, o deputado do BNG Francisco Jorquera mostrou o seu apoio à moçom, mas reconheceu que a posiçom do Bloco é «mais modesta», assegurar o direito de um galego falante a falar a sua língua na Galiza. PNB e CiU também deram apoio à moçom.
