PGL – O porta-voz de Língua do Grupo Parlamentário dos Socialistas da Galiza, Francisco Cerviño, amossou apoio à reivindicaçom do colectivo Fala Ceive do Berzo para que Castela e Leom reconheça galego como língua própria da comarca berciana.
A petiçom foi transmitida polo parlamentar socialista ao seu homólogo castelám-leonês Francisco Ramos, que exerce de poente na reforma da Lei do Berzo, que se atopa ainda em fase de debate.
A petiçom de Fala Ceive, referida já no PGL e transmitida a todo o conjunto da sociedade, instituiçons e entidades centradas na normalizaçom do nosso idioma, foi formulada diante das Cortes de Castela Leom. Consiste na incorporaçom desta comarca à protecçom e ajuda à língua galega. O colectivo berciano afirma que a norma nom incorporou o galego na sua redacçom original, que data de 1991, e que, por segunda vez, está a ser ignorada.
Cerviño amossou a sua «disposiçom a acolher esta posiçom», baseando-se no feito de que já o novo Estatuto de Castela e Leom contempla umha especial protecçom à língua galega nas comarcas galego-falantes. Segundo o parlamentar socialista, pedirá-se à Comissom do Interior e a Justiça das Cortes vizinhas para que a Lei determine que o galego é o idioma próprio do Berzo ocidental e que representa umha singularidade cultural que conforma a comunidade lingüística a proteger.
+ Ligaçons relacionadas:
- Os socialistas apoiam Fala Ceive do Berzo [Galicia Hoxe, 04/10/2010]
- Fala Ceive pede ajuda à Galiza polo reconhecimento oficial do galego no Berzo [PGL, 15/09/2010]
- Fala Ceive reclama o reconhecimento do galego na reforma da Lei da Comarca do BerzoPGL, 17/08/2010] [
- Fala Ceive pede Dia das Letras 2011 para o berciano Antonio Fernández y Morales [PGL, 14/06/2010]
- Solicitam que se reconheça oficialmente o galego na lei comarcal do Berzo [PGL, 25/01/2010]
- Sem TVG nas Comarcas do Berzo e a Seabra [PGL, 04/11/2009]
