PGL – O colectivo Fala Ceive demanda que as Juntas de Castela e Leom e da Galiza negociem para que nas comarcas do Berzo e a Seabra continue a ser possível receber o sinal da TVG após o apagamento analógico.
As comarcas galegofalantes de Castela e Leom poderám deixar de receber o sinal da TVG com a implantaçom da Televisom Digital Terrestre (TDT). Por isso, a associaçom Fala Ceive do Berzo solicita às administraçons públicas que pactuem para garantir e manter a recepçom da TVG digital nessas zonas.
O grupo socialista, apresentou nas Cortes espanholas umha proposiçom nom de lei que será debatida pola Comissom de Transportes e Infra-estruturas, para que a Junta de Castela e Leom negocie com a da Galiza o instrumento jurídico que permita receber o sinal da TDT da Galiza nestas comarcas.
Os procuradores Manuel Fuentes e Pedro Nieto justificam a petiçom baseando-se em que os municípios do Berzo e a Seabra recebêrom durante anos e sem problema a emissom da TVE e da TVG, tal e como corresponde a umha comarca na que a maioria dos cidadáns conhecem as duas línguas.
Casos paralelos
Mercê à negociaçom entre províncias vizinhas, outras comunidades do Estado espanhol partilharám o sinal da TDT. Exemplos disto som a Televisom Digital da Catalunha, que se receberá em catalám no oriente do Aragom e no norte de Valência; a Televisom Digital de Euskal Herria, que emitirá em basco em Navarra; ou a Televisom Digital de Madrid que poderá ser vista nas Comunidades Autónomas vizinhas de Castela.
+ Ligaçons relacionadas:
- Petiçons culturais do Berzo aos partidos políticos galegos [PGL, 17/02/2009]
