Fala Ceive – A associaçom cultural Fala Ceive do Berzo dirige-se aos partidos políticos galegos, ante as eleiçons de 1 de Março de 2009, para que tenham em conta um feixe de propostas culturais em prol da protecçom do idioma galego na regiom berciana.
Visita ao Parlamento Galego
O poder legislativo galego tem que conhecer de primeira mao a problemática do galego no Berzo. Por isso resulta preferente a preença dos colectivos galeguistas e os entes locais do Berzo (Conselho Comarcal, concelhos e pedanias) no Parlamento da Galiza. Resulta abraiante que ainda hoje nom participassem os os ditos representantes bercianos na Comissom de Cultura para exporem a nossa problemática cultural e propor medidas de colaboraçom interterritorial.
Reforma da Lei da Comarca do Berzo
Desde o ano 1991, o Berzo tem certa autonomia que lhe concede a Lei de Castela e Leom 1/1991, pola qual foi aprovada a criaçom da Comarca. Durante a Primavera de 2009 está previsto o início da reforma profunda da dita Lei. Quanto isto tiver lugar pediremos às instituiçons políticas da Galiza (Parlamento, Junta…) e educativas (universidades, associaçons culturais…) apoio expresso para que se reconheça a protecçom e o fomento do idioma galego no articulado da dita Lei da Comarca.
Ensino do galego
O ensino do galego na regiom berciana vai para diante, paseninho, mas com a sua problemática particular. Contudo, ainda há centros escolares que se resisten a impartir a matéria de galego, casos como o da Veiga do Vale Cárcere, Carrazedelo, Quilous, Faveiro e Ponferrada. A Comissom de seguimento interautonómica de ensino galego deve fazer mais por resolvermos esta problemática. Deste jeito, todos os colégios públicos do Berzo ocidental, zona plenamente galego-falante, deveriam ter aulas de galego de oferta obrigatória para os centros e de opçom voluntária para o alunado. Só assim todos os jovens bercianos poderám exercer livremente o seu direito ao aprendizado do galego.
Outras intervençons institucionais nesta matéria devem potenciar-se. Som as atividades extra-escolares (viagens à Galiza, trocas escolares…), materiais pedagógicos para professorado e alunado, campanhas escolares em prol do galego, introduçom de novas tecnologias da informaçom no Berzo, ‘bercianizaçom’ dos portais educativos (www.edu.xunta.es e www.educa.jcyl.es), etc.
En materia de universidades pode implantar-se o ensino do galego no cámpus de Ponferrada. As universidades galegas deveriam fazer jornadas, seminários e demais actividades também no Berzo, como investigaçom histórica ou filológica.
Meios de comunicaçom
Há um espaço de comunicaçom galego comum, além dos lindeiros da actual Comunidade Autónoma da Galiza, que se deve proteger e potenciar. A CRTVG tem que fixar um correspondente especial dedicado a cobrir a informaçom gerada na faixa estremeira galego-falante (Eu-Návia, Beerzo, Seabra). Também cumpre melhorar o sinal e cobertura nestes territórios. Ainda, precisa-se umha linha de ajudas económicas da Junta da Galiza para os meios de comunicaçom da regiom para fomentar o uso do galego em jornais, rádio, TV ou internet.
Cultura
Demandamos neste campo a doaçom de mais livros emgalego para as bibliotecas municipais e escolares do Berzo, programas informáticos para bibliotecas e cibercentros rurais, campanhas de fomento da leitura, presença do livro galego em feiras, semanas do livro infantil, apresentaçom de obras e de autores galegos por parte das editoriais da Galiza.
Real Academia Galega
O escritor Antonio Fernández y Morales escreveu em 1861 um livro composto por textos em galego berciano. Pedimos à Real Academia Galega que, coincidindo o vindeiro ano 2011 com o 150 aniversário da publicaçom da dita obra, se dedique o correspondente Dia das Letras a este escritor. Deste jeito, faria-se umha outra merecida homenagem aos falantes da faixa estremeira após a que já tivo lugar com a dedicatória de um Dia das LEtras a frei Martim Sarmento.
As administraçons locais
Resulta necessária a sinatura de um convénio de colaboraçom entre a Junta da Galiza e o Conselho Comarcal do Berzo em matéria de protecçom do galego. Deve incluir o fomento do uso institucional deste idioma, criaçom do serviço lingüístico berciano, cursos de galego para pessoal administrativo, curso de galego a distáncia (www.aulabierzo.com), a recuperaçom da toponímia, actualizaçom do direito consuetudinário, criaçom de páginas web dos concelhos rurais, etc.
As associaçons culturais
Propomos à Conselharia de Cultura a criaçom de umha linha de ajudas económicas específica para a faixa galego-falante destinada às associaçons culturais que fomentem o uso do galego, a ediçom de livros e revistas de temática berciana e a criaçom do Centro Cultural Frei Martim Sarmento em Vila Franca do Berzo Vilafranca do Bierzo (composto por biblioteca, sala de exposiçons e arquivo, entre outros).
+ Ligaçons relacionadas:
- ‘Fronteiras’ nos Festivais de Cinema de Ponferrada e Ourense [PGL, 01/10/2008]
- Cresce a procura do ensino de galego no Berzo e na Seabra [PGL, 16/09/2008]
