PGL – O documental Fronteiras, dirigido por Rubén Pardinhas, foi seleccionado na secçom Kaleidoskopio do 6º Festival de Cine de Ponferrada, que se realiza na cidade berciana desde o 26 de Setembro até ao 4 de Outubro. A projecçom terá lugar no auditório de Caja Espanha às 20h30 de hoje, 1 de Outubro.
Segundo informam da produtora do documentário, Pasacana Films, a película também foi seleccionada para o 13º Festival de Cinema Internacional de Ourense, onde se projectará na secçom Panorama Galiza no próximo14 de Outubro.
O documentário televisivo ‘Fronteiras‘, realizado por Rubén Pardinhas e estreado adquirido pola TVG, pretende atingir o conflito linguístico, identitário e mesmo territorial de aquelas comarcas que, ficando fora da Galiza administrativa, encontram no galego o seu idioma de uso comum. O nosso autor, visível perante a cámara, viaja por terras de Seabra, da Raia Seca, do Berzo e, ainda, do Eu-Návia, entrevistando a vizinhança e filólogos que oferecem visons muito diferentes acerca do tema.
Ao mesmo tempo, Pardinhas procura vozes de especialistas do interior que vám desde a defesa da oficialidade lingüística de X. L. Méndez Ferrín, até a reivindicaçom reintegracionista de Maurício Castro passando polo pensamento um pouco mais diletante de Xosé Manuel Beiras. Desta maneira pode parecer, da distáncia, que o filme chega a esse grau de pluralidade e objectividade tam pretendido pola ciência jornalística.
Produzido por Pasacana Films, este trabalho conseguiu em 2006 o Prémio Xpréssate ao melhor projecto de documentário no II Festival Internacional de Documentais de Tui «Play-Doc». Também foi estreado no Play-Doc ’07 e participou, entre outros, no III Festival Internacional de Cinema Jovem de Santa Maria da Feira FEST 07 (Portugal, 2007), o 45º Festival Internacional de Cine de Gijón (2007), o 21º Cineuropa de Santiago de Compostela (2007), o V Documenta Madrid 08 ou a 40ª Muestra Cinematográfica dele Atlántico Alcances 08 (Cádis).
+ Ligaçom relacionada:
