PGL – O programa A língua do peixe, que se emite na rádio municipal do concelho marinhão de Foz, entrevistou Andoni Herrera, correspondente do PGL no País Basco. Junto a ele, a sua mulher, Paz Pinheiro, e o seu filho, Egoitz Herrera.
Na entrevista, Andoni, natural da localidade basca de Barakaldo, explica como foi o seu contacto com o galego, em particular com o reintegracionismo. Na conversa fica de relevo o interesse de Herrera polas diferentes línguas, bem como o carácter multilingüe de umha família que realiza a sua vida quotidiana em basco —exceto quando visitam a Galiza, que mudam para o galego. Egoitz, filho de ambos, socializado em basco em Barakaldo aprendeu a língua da Galiza especialmente nas visitas familiares ao nosso país.
«Conhecer a língua de um país ajuda a conhecer e perceber a sua cultura», sentencia Herrera, perguntado acerca da importância que tivo para ele aprender galego.
A transmissom de línguas, a normalizaçom lingüística das línguas galega e basca, as dificuldades de dominar duas línguas totalmente diferentes como estas ou as atitudes sociais som alguns outros dos temas tratados na conversa.
A língua do peixe é um espaço elaborado polo serviço de normalizaçom lingüística do Concelho de Foz. Emite-se na freqüência 107.4 as segundas-feiras de 18 a 19h.
