PGL – Em resposta às questons parlamentares apresentadas polo Bloco Nacionalista Galego acerca do envio de manuais de prevençom de riscos laborais e o atendimento telefónico só em espanhol para a declaraçom da renda, o governo galego pom escusas que apenas confirmam um desleixo reiterado em defesa dos direitos das pessoas galego-falantes.
Quanto à primeira questom, a resposta da Conselharia da Educaçom e Ordenaçom Universitária é que os manuais «fôrom elaborados por iniciativa da Fundaçom Alcoa, que subvencionou a dita obra». Após o envio, a Conselharia decidiu traduzir o trabalho ao galego, matéria ainda por finalizar, pois as versons em galego ainda nom chegárom às instalaçons educativas, que contam há meses com as ediçons em castelhano.
Declaraçom, nom por telefone
No referido às queixas recebidas por parte dos usuários polo atendimento telefónico só em espanhol para realizarem a declaraçom da renda, a Junta cala e outorga. Após defender a gestom da defesa do galego por parte da Secretaria Geral da Política Lingüística (como costuma acontecer nestes casos), a Conselharia da Educaçom remete-se à existência de um manual para fazer a declaraçom da renda em galego, ignorando as petiçons para que, como em anos anteriores, se poda receber atendimento em galego.
Com este manual, Política Lingüística parece contentar-se, já que «incide no objectivo no Plano Geral de Normalizaçom da Língua Galega de dotar este idioma dos recursos lingüísticos e técnicos necessários que o capacitem para veicular a língua moderna e que favorece a possibilidade de viver em galego». Nada mais longe da realidade.
+ Ligaçons relacionadas:
- Reclamam o direito a realizar a declaraçom da renda em galego [PGL, 04/06/2010]
