Diário Liberdade – No Concelho da Corunha cozinha-se um novo ataque à nossa língua. O líder do PP nesse Concelho, Carlos Negreira, tem proposto que o Dia das Letras Galegas deixe de ser feriado e seja substituído polo “Sam Joam”, o Solstício de Verao.
O presidente da cámara municipal da Corunha, o espanholista Javier Losada (PSOE), mostrou-se de acordo com a proposta do PP, da qual dixo que é “positiva” e que ficaria “encantado” se a Junta agir nesse sentido —o Dia das Letras Galegas é escolhido como feriado por Compostela—. O BNG, sócio de Losada no governo, rejeitou a ideia.
Com motivo da escolha dos feriados municipais, os três partidos com representaçom na cámara corunhesa aproveitárom para criar polémica e pôr no cenário a sua política-marketing a que já nos tenhem tam afeitos. Houvo acusaçons por nom escutar a cidadania, e por que dixo ou nom dixo um antes que o outro. Nada novo.
Utilidade da substituiçom
Segundo Negreira, o Dia das Letras Galegas deve deixar de ser feriado para ser “um dia participativo, no que os alunos podam ir aos colegios e todos podamos participar de essa festa” (?!).
A jeito de reflexom, cumpre lembrarmos as imensas manifestaçons que no Dia das Letras Galegas tenhem acontecido contra as políticas galegofóbicas do governo autonómico e que tam inconfortáveis som para o PP.
Escolha dos feriados e festas populares
Além dos feriados impostos polo governo espanhol no nosso país, a Junta da Galiza pode escolher até três dias e os governos locais dous.
No caso do governo autonómico galego, tal escolha incluiu o 19 de Março –Sam José- e o 17 de Maio –Dia das Letras Galegas. O governo local corunhês tomou como feriados a Terça-feira de Carnaval e o 8 de Outubro –dia da Imaculada Concepçom.
A celebraçom da noite do Solstício de Verao –Sam Joam, segundo o nome cristao imposto- é umha das celebraçons que ainda conservam o caráter popular na Galiza, e desde há anos vem-se demandando desde grande parte da sociedade a declaraçom do dia 24 de Junho como feriado.
Porém, é curioso que havendo quatro feriados –dous de eleiçom da Junta e dous da cámara municipal corunhesa- PSOE e PP blindem os de caráter católico e dirijam a discussom sobre os outros dous.
