Nationalia.cat – Roménia, tal como muitos outros Estados europeus, nom é um país homogéneo. Tem umha grande diversidade de povos e línguas, e nalguns lugares, os romenos som minoria. Este é o caso dalguns municípios do centro do país, habitados principalmente por pessoas de origem húngara székely.
A sua força demográfica é inegável e tem garantido certos direitos, tais como a protecçom da língua e a presença nas instituiçons, mas os székely querem o reconhecimento dos seus direitos colectivos como povo, com um referente claro: o sistema autonómico do Estado espanhol.
Estabelecidos nos Cárpatos para proteger umha das fronteiras do império Húngaro, os székely confirmárom-se ao longo dos séculos como povo específico dentro da etnia húngara ou magiar. As suas origens remontam-se como mínimo aos séculos X e XI, quando assentárom na parte da Transilvânia onde ainda moram nos dias de hoje, principalmente nos condados de Harghita, Covasna e Mureş.
Os székely passárom por umha grande variedade de sistemas políticos. Já na Idade Média, estavam organizados arredor de sete unidades políticas autónomas dentro do império Húngaro. Os serviços que prestavam ao império eram sobre todo em matéria militar, mercê à sua reputaçom como hábeis guerreiros.
Com a chegada do Principado da Transilvânia, os székely perdérom praticamente toda autonomia, que posteriormente reconquistarám durante as décadas seguintes, mais umha vez mercê à sua potência militar. Baixo os Habsburgos, os székely volvêrom a perder força política, se bem conseguírom manter boa parte das suas instituiçons. A relaçom com o império nunca foi fácil, posto que as autoridades imperiais tratavam de incidir continuamente na vida política e social da comunidade.
Durante a revoluçom de 1848, os székely apoiárom a uniom da Transilvânia na Hungria. Foi assim durante umhas décadas, até que em 1920, em virtude do Tratado de Trianon, o território székely e o resto da Transilvânia unificou na Roménia. Durante um breve período de tempo (1952-1960), os anos da Roménia comunista, o território székely constituiu a Província Autónoma Húngara, o auto-governo era praticamente inexistente e quase se limitava à oficialidade da língua húngara. Hoje, os székely tenhem garantido um certo reconhecimento dentro do Estado da Roménia. No Parlamento do país, a Uniom Democrática de Húngaros na Romenia (RMDSz) -um movimento que nom representa só aos székely, mas toda a comunidade magiar- é a quarta força, e em várias ocasions formou parte de coalizons governamentais de maioria romena. A língua húngara tem unha protecçom genérica nos territórios onde se fala.
Porém, embora seja umha populaçom de mais de 600.000 habitantes e ser maioria em Harghita e Covasna, os székely nom tenhem qualquer autonomia territorial. Esta foi umha das principais reivindicaçons do movimento, especialmente desde que o Conselho Nacional Székely (CNS), a sua principal organizaçom política, apresentou no Parlamento umha proposta de lei para a autonomia do território. Os seus defensores argumentárom repetidamente que se trata de umha proposta democrática, nem violenta nem separatista, inspirada na autonomia do Tirol do Sul, a Catalunha ou as Ilhas Aland.
O actual presidente romeno, Traian Băsescu, no posto desde o ano 2004, viveu as renovadas demandas de autonomia dos székely e as grandes manifestaçons dos últimos anos, e a sua resposta sempre foi negativa. Segundo o executivo romeno, o autonomismo destas denominadas minorias esconde «o intento de alterar a integridade territorial dos estados sob o disfarce da defensa dos direitos das minorias». Sempre que tem oportunidade, Băsescu pontifica contra dos direitos colectivos dos povos, e em mais dumha ocasiom manifestou que nunca concederá a autonomia territorial aos húngaros.
Podedes encontrar mais informaçom sobre esta questom em Nationalia, aqui e aqui. Para saber mais, podedes consultar o diário digital Diverso.ro, especializado em minorias étnicas da Romenia e disponível em romeno e inglês, ou também os diários generalistas Evenimentul e Ziua, em romeno. No que atinge às organizaçons políticas e culturais, ademais do RMDSz e CNS, existem o Partido Cívico Magiar (PCM), outra formaçom política húngara. Para informaçom histórica e mapas, também podedes consultar um artigo no LGI e na Wikipédia (inglês ou português).
