Nationalia.cat – A maioria das naçons tenhem umha alcunha, ou umha denominaçom que os seus membros consideram ofensiva ou pejorativa. Araucánia é um desses nomes, e se bem hoje pode ser relativamente desconhecido, durante muitos anos soou com força na corte espanhola.
Os mapuches -os antigos araucanos- fôrom dos poucos povos indígenas que resistírom a chegada dos colonos europeus na América do Sul. A sua situaçom complicou-se com o cerco aos seus territórios ancestrais por parte dous novos Estados: o Chile e a Argentina.
A naçom mapuche –Wallmapu, na língua mapudungun- estende-se por umha parte importante do que hoje som os Estados do Chile e a Argentina. Historicamente, os mapuches fôrom os principais povoadores do território que vai do rio Mapocho e Buenos Aires, no norte, até o arquipélago de Chiloé e a Patagónia, no sul. Os mapuches lográrom defender esta terra das duas grandes ameaças imperialistas dos séculos XV e XVI: o Império Inca, primeiro, e a colonizaçom espanhola depois.
Apesar de perder parte do seu território durante os intentos de invasom, o povo mapuche logrou deter o avanço dos demais e, no caso do império espanhol, logrou a assinatura de um tratado de paz mercê ao qual se outorgou autonomia aos territórios mapuches ocupados.
A declaraçom de independência do Chile no século XIX causou para os mapuches um novo combate contra a ocupaçom, justificado esta vez com a unidade da nova República e que os mapuches nom fôrom capazes de repelir. A chamada Pacificaçom da Araucánia significou a perda da independência mapuche e, ao tempo, a rotura da sua unidade territorial, pois a populaçom mapuche relegou-se a reservas índias ou reduçons.
Wallmapuwen
No decorrer do século XX, a populaçom mapuche, instalada principalmente no estado chileno -604.000 em Chile contra 100.000 na Argentina, segundo os respectivos censos estatais-, foi avançando na reivindicaçom dos seus direitos colectivos. Hoje, o movimento político mapuche visibiliza-se principalmente na demanda das suas terras, que atualmente estám nas maos de grandes latifundistas. Mas a acçom política é mais ampla, mercê à apariçom de novos actores, como o partido político Wallmapuwen, e aos cambios a escala internacional, principalmente desde a aprovaçom da Declaraçom dos Direitos dos Povos Indígenas da ONU, sob a qual algumhas comunidades indígenas da América Latina já começárom a exercer o seu próprio autogoverno.
O contexto, portanto, é favorável para que o povo mapuche poda alcançar o pleno reconhecimento dos direitos políticos e culturais. Há que ver qual o papel que jogará Wallmapuwen nas próximas eleiçons legislativas chilenas, pois poderia ser a primeira vez que os mapuches podam jogar as suas cartas no ámbito político chileno.
Wallmapuwen representa um movimento político muito diferente ao do resto de movimentos indigenistas do continente, tanto que o seu objetivo é conseguir umha certa decentralizaçom do Chile que dote o território mapuche de umha grande autonomia. Wallmapuwen-Partido Nacionalista Mapuche inspira-se e tem relaçons com os partidos autonomistas e independentistas de algumhas naçons sem Estado européias, como o Plaid Cymru galês, Esquerra Republicana de Catalunya, o Bloco Nacionalista Galego ou a Uniom Democrática Bretona.
As ameaças, porém, som também muito vivas. A ocupaçom forçada de terras que levárom a cabo grupos de ativistas mapuches provocárom vários choques com a polícia chilena. Alguns sectores aproveitam esta circunstáncia para fazer ver o nacionalismo mapuche como um movimento violento e, ademais, ligado com organizaçons armadas de outros países, como as FARC ou a ETA. Isto fai com que a legislaçom antiterrorista tenha sido aplicada nalgumhas ocasions contra mapuches, feito criticado por organizaçons internacionais, como Human Rights Watch e chilenas, como Observatório de Direitos dos Povos Indígenas.
No campo da informaçom, há na rede material suficiente sobre o povo mapuche. Para seguir a actualidade, som recomendáveis Azkintuwe e Mapuexpress, ademais do já citado Centro de Documentación Mapuche. Son mídias mapuches nos que, porém, a língua mapudungun nom tem práticamente nada de presença. Podem encontrar-se ligaçons, publicaçons, dados e outros recursos no directório de Minority Rights Group e no Instituto dos Direitos Humanos da Catalunha.
