PGL – Após a convocaçom unilateral de umha manifestaçom para 17 de Maio próximo feita pública há uns dias pola Mesa, diversos sectores normalizadores estám a promover «umha iniciativa unitária e em pé de igualdade» e independente «das directrizes políticas de nengumha direcçom política».
Após o acontecido no dia 8 de Fevereiro, este grupo promotor por umha mobilizaçom unitária, tem claro que existem energias para relançar a mobilizaçom social pola língua, embora que «alguns setores normalizadores, ainda sendo os que mais mobilizam em termos quantitavos, fagam isso em funçom de interesses estritamente partidistas».
As propostas base que lançam a todos os locais e entidades interessadas nesta iniciativa aberta, som as que seguem:
1. Conjuntamente, os sectores que em diferentes lugares da Galiza e de diferentes maneiras trabalham pola nossa língua, devem defender umha iniciativa unitária e aberta para a convocatória de um 17 de Maio mobilizador e unitário, umha espécie de «Galiza Nom Se Vende», lingüístico.
2. É necessária umha convocatória horizontal e sem subordinaçons para este 17 de Maio, realizada nom por umha entidade, nem duas, nem três, mas por todas as que tenham interesse nisso, cedendo a iniciativa às entidades de tipo lingüístico-cultural, como os centros sociais, associaçons culturais, entidades sindicais e outras.
3. A mobilizaçom deverá ser um primeiro passo numha nova dinámica de fiscalizaçom e denúncia da política lingüística do próximo governo autonómico e dos governos municipais, denunciando conjuntamente as agressons e incumprimentos instituicionais e de entidades e empresas privadas em relaçom aos direitos lingüísticos. Em funçom da capacidade da iniciativa, irám sendo abrangidos os diferentes ámbitos: judicial, ensino, comercial, etc, na fiscalizaçom e na defesa dos direitos lingüísticos, tanto a nível nacional como comarcal e local.
4. No caso de que A Mesa decida convocar em solitário, as entidades ligadas ao movimento reintegracionista e normalizador de base terám que estudar, conjuntamente, de que maneira participam numha mobilizaçom unilateralmente convocada, como nos últimos anos, pola Mesa/BNG.
O grupo convocante, com o objecto de debater esta proposta unitária em defesa da nossa língua, chama a partiicipar numha reuniom aberta a decorrer neste Sábado, dia 14 de Março, às 17h00, na Gentalha do Pichel em Compostela.
