Maria Espantoso – Meio cento de amigos e amigas arroupárom o Portal Galego da Língua no ato de celebraçom do décimo aniversário, que decorreu no passado sábado, 22 de dezembro de 2012.
Embora a efeméride calhou o 17 de Maio, decidiu-se adiar a comemoraçom para fazê-la coincidir tanto com umha assembleia como com a festa de boas-vindas aos novos sócias e sócias (que tivo lugar a noite anterior), bem como facilitar os trabalhos para a publicaçom do volume PGL_10, um repasso por esta primeira década de um projeto que marcou a fogo o reintegracionismo do século XXI.
O ato de homenagem decorreu no restaurante compostelano A Nave de Vidán, cujas modernas instalações evidenciárom ser um cenário idóneo para celebrações deste teor. Após a parte gastronómica, autêntica homenagem para os comensais, o espaço multifuncional e mais audiovisual da Nave acolheu a parte mais institucional. Conduzido pola jornalista, atriz e realizadora Comba Campoi, o ato decorreu muito agilmente, com sucessom de intervenções de alguns dos protagonistas, a música do Rui David (acompanhada por Najla Shami no final) e as sempre pertinentes precisões da apresentadora.
A música do Rui David amenizou o ato
Meio cento de pessoas participárom na celebraçom
Comba Campoi apesentou e conduziu o evento
O PGL nasceu sendo presidente da AGAL Bernardo Penabade, e ele foi o primeiro dos protagonistas em tomar a palavra. Na breve intervençom que realizou, parabenizou o anterior Conselho mais o atual, que leva só dous meses, polo trabalho realizado, e ofereceu-se a ajudar no que for necessário. Afirmou que o reintegracionismo está de celebraçom, pois o PGL existe ainda hoje em dia, ao contrário que outros “projetos que, precisamente, fôrom apenas isso, projetos”.
Após a intervençom de Penabade, Comba Campoi desculpou a ausência do sucessor deste à frente da AGAL, Alexandre Banhos, quem finalmente nom se pudo deslocar a Compostela para a celebraçom.
O seguinte interveniente foi outro ex-presidente da associaçom, Valentim Fagim, quem falou dos seus vínculos com o Portal Galego da Língua e de alguns dos projetos em que ele participou como parte da equipa informática da AGAL (mormente de teor lúdico e formativo), como o “Isso não é galego, é português” ou o “Dicionário de Fraseologia”, entre outros. Na sua intervençom também pujo em valor a importância do PGL para todo o reintegracionismo, ligando já com o conteúdo do seguinte relator, Gerardo Rodrigues, em representaçom da equipa de redaçom do PGL.
O representante da redaçom do PGL afirmou que se o Portal Galego da Língua ainda continua é porque preencheu umha necessidade comunicacional, pois “nom existia, nem existe, nada do seu género”, isto é, um meio de comunicaçom criado no seio do reintegracionismo e centrado em informar acerca da atualidade lingüística da Galiza com umha perspetiva lusófona. Acabou assinalando alguns dos retos para o ano 2013, como a renovaçom técnica e melhorar a interaçom com as redes sociais.
As dissertações finais correspondêrom ao Vítor Manuel Lourenço Peres, coordenador da área informática da AGAL, e ao atual presidente da associaçom, Miguel Rodrigues Penas, quem também formou parte dessa área. Lourenço fijo um repasso polos 10 anos de vida do PGL, acompanhando a sua exposiçom com alguns diapositivos que continham capturas do Portal em diferentes épocas. Da inicial, concibida a modo do ecrã de um televisor, ao que já seria a sua versom mais conhecida, e daí à atual. Destacou algumhas das colaborações mais importantes, bem como alguns fitos da história do Portal que ultrapassárom o âmbito digital, como fôrom a recuperaçom da figura do Apalpador e a popularizaçom das piadas do 1 de Abril.
Vítor Lourenço acompanhou a sua intervençom com capturas
de ecrã de diferentes épocas do PGL
Momento da intervençom de Miguel Penas,
que exibe um exemplar de PGL_10
No seu turno, o presidente da AGAL assinalou que o PGL contribuíu a “mudar o rumo do reintegracionismo”, a criar umha nova estratégia que está agora “a se tornar num novo discurso” que assenta em três pilares: a liberdade para expor opiniões e difundir ideias, a abertura para exibir diferentes conteúdos e perspetivas, e o respeito por todas as propostas. Destarte, acabou-se com “o discurso dos amigos-inimigos” que, em sua opinom, “tam pouco têm achegado ao trabalho de regeneraçom e dignificaçom do galego”. Penas recomendou também a leitura do livro PGL_10, um trabalho coletivo em que pessoas da Galiza, Brasil, Portugal ou o País Basco explicam a sua vinculaçom com o Portal a partir de diferentes perspetivas.
Najla Shami e Rui David pugérom música e voz ao final do ato
+ Ligações relacionadas:
- “O Portal Galego da Língua converteu-se no grande símbolo da nova estratégia da AGAL” [Dioivo, 24/12/2012]
- A AGAL celebra os dez anos do Portal Galego da Língua esperançada no futuro do reintegracionismo [Praza Pública, 24/12/2012]
