PGL – A Mesa pola Normalizaçom dirigiu-se à Direçom Geral de Tránsito (DGT) e à Junta da Galiza para facilitarem mateirias formativos em galego para lograr a carta de conduçom, atualmente um dos ámbitos em que a nossa língua continua excluída.
Da associaçom que preside Carlos Callón lembram que já é possível realizar o exame escrito em galego, para o qual apenas cumpre comunicá-lo previamente na autoescola. Porém, aclaram, «a maioria da gente nom sabe que isso é assim, porque as autoescolas nom costumam comentá-lo» e, aliás, «tampouco contam com material de formaçom» na nossa língua.
A Mesa lembra que a começos do ano passado, o «polémico» [sic] secretário-geral de Política Lingüística, Anxo Lorenzo, «anunciou no Parlamento que se editaria aginha um manual de conduçom em galego para a licença B, que é a mais habitual». Porém, passárom os meses e «continuamos sem ter notícias» da publicaçom.
Esta associaçom pede também que a DGT se implique, pois é a entidade que tem as competências na matéria, especialmente desde que o Governo central se negou a transferir para a Galiza as competências de tránsito, apesar de o Parlamento nacional lho ter solicitado ao espanhol por unanimidade.
