PGL – A Agrupaçom Cultural O Facho da Corunha convida as pessoas interessadas a participar numha nova sessom do seu ciclo de palestras públicas do período 2011-12. Decorrerá esta terça-feira às 20h na Fundaçom Caixa Galicia, localizada no Cantom Grande da cidade herculina.
No ato de hoje, o historiador José Manuel Barbosa Alvares falará sobre “A mudança do paradigma historiográfico na Galiza”. Barbosa desenvolve desde 1992 as tarefas de professor de Galego e Educaçom Física como funcionário da Junta de Galiza e de professor nos cursos de Língua, Literatura, História, Arte e Cultura Galegas organizados pola Universidade de Vigo e/ou a AGAL.
Desde 2008 forma parte da Academia Galega da Língua Portuguesa (AGLP). Carateriza-se, segundo o Facho, por ser «um grande ativista no campo da cultura», e colocam como exemplo o seu papel de organizador do I Ciclo de Cultura Galega —dentro da qual se arranjárom as I Jornadas de História de Galiza em 2003—, produtor de várias representaçons de obras teatrais como Quanto vales tu, meu tentador de Joel R. Gomes, e as Jornadas de Jogos populares de Riba d’Ávia. Colabora em publicaçons periódicas galegas e portuguesas (Agália, La Región, etc…).
Possui também umha interessante obra publicada: Curso Prático de Galego, Ámago/Magoa (livro de poesia em parceria com Roi Brás), Bandeiras da Galiza (Estudo vexilológico das bandeiras da Galiza no transcurso da história) e Atlas histórico da Galiza.
+ Ligaçons relacionadas:
- Site da A.C. O FACHO
- Obras de J. M. Barbosa na Imperdível
- Desperta de teu sono [blogue do autor]
