As bases podem ser consultadas já no sítio web www.youtubeiras.gal. O prazo de inscriçom está aberto até as 23h59 do 16 de novembro
Vigo, 17 de setembro.- Youtubeiras+, projeto organizado polos serviços de normalizaçom linguística de dez concelhos, das três universidades e da Deputaçom da Corunha com o objetivo de promover o talento em galego nas redes sociais, chega à novena ediçom com grandes mudanças nos seus galardões. Os Prémios Youtubeiras+, cujas bases podem ser consultadas já em www.youtubeiras.gal, abrem a participaçom à criaçom de conteúdos na nossa língua em qualquer rede social e em todos os formatos. O concurso, que até a ediçom passada só permitia concorrer a quem lançasse as suas criações no YouTube e TikTok, amplia o campo de açom e permite competir as persoas maiores de 16 anos que tenham canais autoproduzidos nas redes sociais em ativo e acessíveis durante o certame. Estas novidades fôrom anunciadas hoje em conferência de imprensa pola vice-reitora de Extensom Universitária da Universidade de Vigo, Susana Reboreda; o alcalde de Ames, Blas García; o regedor do Concelho de Róis, Ramón Tojo, e a concelheira de Normalizaçom Linguística de Moanha, María Dolores Chapela.
Youtubeiras+ é uma iniciativa organizada polos serviços de normalizaçom linguística dos concelhos de Ames, Carvalho, Ferrol, Moanha, Narom, Oleiros, Ponte Vedra, Róis, Santiago de Compostela e Teo; das universidades da Corunha, Santiago e Vigo; e da Deputaçom da Corunha
Na sua intervençom, Reboreda pujo em valor «a colaboraçom das três universidades galegas» neste projeto, uma colaboraçom que, aos seus olhos, mostra «o nosso compromisso com a língua, cujo futuro está nas novas gerações e nas novas fórmulas de comunicaçom que empregam cada dia». «As redes sociais som um ecossistema fundamental para a projeçom das línguas», assinalou a vice-reitora antes de engadir que os Prémios Youtubeiras+ se tornam «mais abertos, mais amplos e ainda mais inclusivos» graças às mudanças que se introduzem nesta novena ediçom.
Categorias, prémios e inscriçom
Precisamente, estas mudanças centrárom a intervençom da concelheira de Normalizaçom Linguística de Moanha, quem quijo salientar a implicaçom das diferentes instituições que som companheiras neste projeto. «Os esforços coletivos das instituições constituem o caminho ideal para fortalecer a nossa língua», pujo de relevo María Dolores Chapela.
Os prémios, que na passada ediçom só permitiam concorrer persoas criadoras com canais no YouTube e TikTok, agora abrem-se a todas as redes sociais para repartir 7500 € entre sete categorias: Canal, Criaçom de conteúdos, Revelaçom, Qualidade linguística, Rede, Podcast e Prémio do Público
A representante do concelho moanhês assinalou que, nesta novena ediçom, os Prémios Youtubeiras+ repartirám 7500 € entre as pessoas ganhadoras das sete categorias em que se divide o certame neste ano: Canal, Criaçom de conteúdos, Podcast, Revelaçom, Qualidade linguística, Rede e Prémio do Público. Todos os prémios estám dotados com 1000 €, exceto os das dúas primeiras categorias, cujos galardões ascendem aos 1250 €. O prazo de inscriçom já está aberto e termina o próximo 16 de novembro às 23h59.
Dados da última ediçom
O regedor do Concelho de Ames, Blas García, encarregou-se de facilitar à imprensa as cifras da anterior ediçom, bem como o volume de participaçom das primeiras convocatórias. Com estes números, García ilustrou a evoluçom duns prémios aos quais concorrêrom um total de 89 canais em 2024, frente aos 68 de 2023. Deles, 49 procediam do YouTube e 40 do TikTok. Ao somar os vídeos criados en todos estes canais ao longo do certame, o cómputo global representou mais de 19 720 minutos de novos vídeos em galego em ambas as plataformas.
No referente ao Prémio do Público, García acrescentou que em 2024 se candidatárom 41 vídeos nesta categoría, frente aos 24 do ano anterior. Para outorgar este galardom, que se decide por voto popular entre internautas, mais de 5000 pessoas participárom na votaçom.
Por último, García partilhou os dados da primeira ediçom de Youtubeiras, que tivo lugar entre 2016 e 2017. Naquela altura, Youtubeiras reparava mais nos vídeos, já que a participaçom nom se aglutinava como agora ao redor dos canais. Com essa forma inicial de contabilizar a participaçom, em 2017 chegárom a concorrer 202 vídeos, enquanto em 2020, no ano dos confinamentos por causa da pandemia da covid, atingiu-se o pico de 536 vídeos.
«Alborotar o algoritmo»
Ramón Tojo, alcalde de Róis, foi o encarregado de desvendar o júri que elegirá os canais e pessoas ganhadoras deste ano: Mónica Valencia, técnica de Normalizaçom Linguística do Concelho de Ourense; Jon Amil, médico e presidente da Associaçom Galega da Língua (AGAL); Carlos Pereiro, jornalista e comunicador de videojogos; María Rúa, criadora de conteúdos e ganhadora do Prémio à Criaçom de Conteúdos de 2024, e Uxío Broullón, ilustrador e desenhador gráfico.
O regedor de Róis lembrou durante a intervençom que os obradoiros de Youtubeiras+, outro piar fundamental do projeto, serán impartidos nesta ediçom por Nuria Espasandín e Sergio Casal, de Toxío, e mais Laura Veiga, de Pingando. Tojo deixou justo para o final um dos elementos mais representativos de cada ediçom dos Prémios Youtubeiras: o lema. «Este ano o lema é Alborotando o algoritmo. Com ele queremos proclamar que, embora os algoritmos tratem de governar sobre o que vemos nas redes sociais, sobre o que falamos nelas e mesmo sobre como devemos falar, a decisom é sempre nossa. Está nas nossas mãos e, também, na nossa língua», concluíu Tojo.
À conferência de imprensa assistírom representantes das diferentes instituições organizadoras: a concelheira de Normalizaçom Linguística de Oleiros, María José Santos Zas; o concelheiro de Normalizaçom Linguística de Ponte Vedra, Demetrio Gómez, e a concelheira de Mocidade e Educaçom de Ames, Carmen Porto Rey.
