Ontem noticiávamos neste portal a eleiçom de Henrique Monteagudo como próximo presidente da Comissom Lingüística da AGAL.
Mas na Galiza, como em Portugal, Brasil e muitos outros Estados, do Reino Unido à Alemanha, Estados Unidos ou Finlandia, o primeiro de abril é o dia das mentiras. Assim é que, se alguém ficou com a dúvida, por agora, esta informaçom é falsa:
O catedrático de Filologia Galega da Universidade de Santiago de Compostela, Henrique Monteagudo, vai ser o próximo presidente da Comissom Linguística da AGAL, em substituiçom de Vítor Meirinho. Esta eleiçom é uma das medidas derivadas do acordo entre a entidade reintegracionista e a Real Academia Galega (RAG) para a concessom do Dia das Letras 2020 a Ricardo Carvalho Calero.
Para Monteagudo, este nomeamento é umha decisom que transcende o acordo entre as duas organizaçons, porque “entra dentro da lógica que um sucessor da cátedra de Carvalho seja quem coordene as diretrizes lingüísticas desta nova etapa de procura de consenso”. Precisamente, para trabalhar por este entendimento, vai tentar compatibilizar este novo cargo com a secretaria da RAG.
O novo presidente da CL valoriza o esforço realizado polo reintegracionismo plasmado na Ortografia Galega Moderna. Contodo, aposta por potenciar a clássica norma da AGAL, pois “conecta-nos diretamente com a nossa tradiçom medieval frente a um aportuguesamento galopante e sem controle”. Monteagudo propom reconduzir o trabalho da Comissom às posiçons de Carlos Garrido, de quem se declara “grande admirador”.
“entra dentro da lógica que um sucessor da cátedra de Carvalho seja quem coordene as diretrizes lingüísticas desta nova etapa de procura de consenso”, sinala Monteagudo
Carvalho vs. Carballo
A respeito da polémica gerada pola RAG ao grafar o apelido do homenageado como “Carballo”, Monteagudo acha “razoável” a procura de “algumha fórmula de consenso”.
A este respeito informa que a RAG está à espera de um ditame do seu Seminário de Onomástica, em que se estuda a conveniência de promover grafias de confluência como “Carbalho” ou “Carvallo” ao aparecerem, respetivamente, “num documento do Mosteiro de Monte de Ramo do século XVI e num verso do Cura de Fruíme”.
Reaçom da presidência da AGAL
O presidente da AGAL, Eduardo Maragoto, celebra a incorporaçom do catedrático muradám ao “navio agálico” pois “era necessária umha figura de ordem numha entidade onde o excesso de flexibilidade ortográfica nos conduziu a debates absurdos, que teriam sido evitados com umha pessoa com a autoridade moral emanada de ser uma sucessora na cátedra de Dom Ricardo”.
Para Maragoto, esta decisom permite que o Conselho nom perca energias em “questons lingüísticas” centrando os seus esforços na organizaçom de mais atividades lúdicas “pois é o que a sociedade está a demandar de nós”.
Tomada de posse, em Fonseca
A tomada de posse deste cargo, vai-se realizar no próximo dia 16 de maio no Salom Nobre de Fonseca coincidindo com o começo da leitura continuada do romance Scórpio. O próprio Monteagudo vai ser quem comece a leitura pronunciando as alegóricas palavras “Antónia deu onte a luz. Foi um parto normal”.
