“Unha festa para gozar coa lingua!” Este é o lema do Festival que vai decorrer no Teatro das Cortes, no lugar do Gestoso, Cabanas (Vicedo), nos dias 9 e 10 de agosto.
Este Festival abre as suas portas às famílias que queiram viver umha festa diferente, com a infância como protagonista, para abrir caminhos desde a simpatia, a música, a natureza e a surpresa.
O Teatro das Cortes é umha iniciativa sociocultural da Associaçom Cultural Volta e Dálle, que tem como objetivo fazer cultura na aldeia. Nos últimos três anos, este projeto impulsionou a música, o teatro, a fotografia e o cinema num espaço autogerido que já se converteu num dos referentes culturais da Marinha.
O programa do Festival é variado. Começa no sábado às 11h30 com o lançamento do Guia sociolinguística para famílias, elaborada pola Escola de Ensino Galego Semente de Lugo, com conselhos para famílias interessadas em transmitir o galego. A seguir, o regueifeiro e domador de pulgas Séchu Sende realizará um obradoiro de regueifa para famílias. E depois, chegará a contacontos Marta Ortiz com o espetáculo “Tralará. Contos, objetos e música”.
Após o almoço, umha mesa redonda dinamizará um encontro sobre “Língua e Infância”. E logo, um lanche.
No marco do programa de Meio Rural da Deputaçom de Lugo “Un gusto de rural, un rural de gusto”, degustar-se-ám sandes de porco celta.
Às 19h00, o grupo de regueifeiras adolescentes “Regueifa Tour” subirá ao reboque dum trator Barreiros para revolucionar a tarde com um espetáculo com pandeiretas, bases eletrónicas e improvisaçom oral cantada.
A seguir, para fechar a primeira jornada, às 20h30, concerto de Paco Nogueiras, artista de referência na música infantil.
O domingo começa com um Diálogo entre culturas, dinamizado polo Proxecto NEO de Burela, com Bernardo Penabade e representantes da Indonésia, Senegal, Cabo Verde e Galiza.
E depois, almoço! Para reservar o almoço, tanto no sábado como no domingo, é imprescindível enviar um correio a voltaedalle@gmail.com antes do dia 6 de agosto às 00:00h.
Para o almoço haverá: calhos, bocatas quentes, raçons ou a opçom vegana da Galipizza.
Um roteiro teatral com o grupo da Associaçom Son D’Aldea, com o título “O valor da auga”, começará depois da sobremesa. E logo deste pequeno trilho pola natureza, haverá lanche.
Outro referente da cultura infantil, o histórico Anxo Moure, apresentará o seu espetáculo “Unha árbore vén vernos”.
E às 20h00, Ugia Pedreira chegará com a sua energia que junta explosividade e serenidade num espetáculo revolucionário, onde o folk, o trad, a eletrónica, o ska e os sons latinos se misturam para fechar o festival com a voz desta artista de Foz, umha das grandes referências da música contemporânea.
Desde o Festival Lingua Moza anunciam que os lanches serám gratuitos para rapazas e rapazes até os 16 anos que assistam às jornadas.
Todas as atividades decorrerám nos arredores do Teatro das Cortes e no próprio teatro. E haverá zona de acampada.
Além destas atividades, as pessoas assistentes também poderám visitar a exposiçom “Bosque de valores” no Espaço da Identidade Cultural Galega, um projeto de Galicia Latente em colaboraçom com a Associaçom Volta e Dálle.
