J. A. Corral Iglesias/Soledad González Maside – O editor e dramaturgo corunhês Francisco Pillado Mayor intervéu o passado dia 10 de Dezembro de 2008 dentro do ciclo «Literatura e Naçom», organizado pola Agrupaçom Cultural O Facho, com a sua conferencia intitulada Aspectos da consideraçom da mulher no recorrer da História.
É por todos bem conhecido o longo percurso cultural Francisco Pillado Mayor, no como teatral desde começos da década de sessenta do século passado até ao seu trabalho tanto como dinamizador cultural, hoje é director da editorial Laiaovento assim como ensaísta.
Pillado Mayor encetou a sua exposiçom partindo da consideraçom profundamente desprezativa da condiçom feminina por parte dos próceres da monarquia sacerdotal papista, desde os Pais da Igreja até diversos Papas. A Igreja outorga-lhes a estes egrégios poderes esotéricos e demiúrgicos e denomina-os santos. Segundo Pillado Mayor tal consideraçom mostra a minusvaloraçom da mulher para o catolicismo, considerada como fonte de todo mal e totalmente incapacitada para qualquer outra funçom que nom fosse reproduzir.
Continuou a sua análise com outra rica mostra de citas de filósofos, desde Aristóteles, Erasmo, Quevedo, Lutero, Nietzsche, etc. para os que a consideraçom da mulher nom tinha nada que invejar às papistas.
A conclusom é desoladora, pois mesmo hoje poderíamos afirmar que a mulher, no mundo que entendemos como ocidental, nom foi outra cousa que um objecto de domínio e de escárnio, sendo sempre a vitima propiciatória do poder ideológico das distintas eirejas (Católico-Romana, Católico-Ortodoxa, Luterana, Calvinista, etc.) que competírom no extermínio massivo das mulheres sob pretexto de elas terem tratos com o Demo, sendo queimadas vivas em fogueiras com lenha verde ou entre tormentos.
A intervençom do conferencista espertou um grande interesse entre o publico assistente como mostrou o colóquio que decorreu ao findar a sua exposiçom.
Descarregar MP3 [36.3 MB | 1 h 19 min]
