PGL – Duas iniciativas do Grupo Parlamentar do Bloco Nacionalista Galego ponhem de manifesto, mais umha vez, a discriminaçom do galego por parte da Junta da Galiza. Nesta ocasiom som alvo das críticas o serviço de Emergências 112 e Meteogalicia.
A unidade de observaçom e prediçom meteorológica da Galiza (Meteogalicia) é um organismo dependente da Conselheria de Medio Ambiente que fornece informaçom meteorológica a diversos meios de comunicaçom no nosso país. O BNG denuncia a reiteraçom na péssima qualidade do galego utilizado nos partes meteorológicos dos serviços informativos da Rádio Galega, que contrasta com a correçom do castelhano empregue nas televisons privadas.
Por este motivo, o Grupo Parlamentar do BNG propom que o Parlamento da Galiza inste o Governo galego “a adotar as medidas precisas para que as informaçons meteorológicas subministradas de jeito oral ou escrito por Meteogalicia a qualquer meio de comunicaçom radicado na Galiza se realizarem integramente em idioma galego, garantindo a precisa correçom lingüística.”
Por sua parte, a Agência Galega de Emergências (Axega), dependente da Conselharia da Presidência, administra o Centro de Atençom de Emergências 112 da Galiza, prestando a atençom requerida polas pessoas que se dirijam a esse serviço. Também neste caso é fácil comprovar que a língua que se utiliza habitualmente na atençom telefônica no serviço de Emergências é o castelhano, denuncia o Bloco, ainda se a pessoa que requer a assistência fala em galego.
Para o BNG, nom é “nem democrático, nem ético, nem legal” que um serviço público prestado pola administraçom pública discrimine o idioma galego na Galiza, vulnerando, com isso, os direitos dos cidadãos. Por todo o qual o BNG pergunta “por que razom nom se utiliza a língua galega na atençom telefônica do Centro de Atençom de Emergências 112 da Galiza, quem é o/a responsável desta situaçom e que medidas, e em que prazo, se adotarám para incorporar o galego nesse serviço”.
+ Ligaçons relacionadas:
- MeteoGalicia
- Axega
- A Junta anula as ajudas para a promoçom do galego dirigidas aos editores e aos concelhos [PGL, 10/09/2011]
- Aqualia: «¿Me puede hablar en castellano?» [PGL, 08/09/2011]
