PGL – Em pouco mais de um mês, a 21 de julho, decorre em Narom o XII Festival da Terra e da Língua, evento organizado anualmente pola Fundaçom Artábria. Nesta ocasiom os festejos terám novidades a respeito de ediçons anteirores.
A primeira, e mais destacável, a mudança de lugar: no centro de Narom, concretamente no passeio marítimo de Júvia. A segunda, o festival passa de dous a um dia, embora haja atividades incorporadas ao programa do mesmo que descorrerám os dias prévios.
No momento de redigirmos estas linhas o programa está sem fechar, mas é possível avançar que a temática da XII ediçom será a oficialidade das seleçons desportivas nacionais. A decisom é devido a que neste verao está a decorrer a Euro-taça de futebol (co-organizada pola Polónia e a Ucránia) e posteriormente serám os Jogos Olímpicos (Londres). Precisamente, o campeonato de futebol está já a provocar umha «overdose de espanholismo», criticam da Artábria. Por esta razom, a defesa das seleçons desportivas galegas será umha forma de enfrentar a «campanha propagandística alheia ao nosso país».
No capítulo musical, o blogue da Artábria publicou vídeo-clipes dos grupos que vam atuar no festival: Cuchufellos, Fracasados de Antemano, Trapallada, bem como o conhecido grupo basco Betagarri.
Por último, da Fundaçom Artábria indicam que é possível colaborar economicamente realizando achegas para o número de conta 2080-0226-61-3040022733.
